ده‌نگوباس:
به‌گوێره‌ى هه‌واڵێكى میدیاى پارتى كه سه‌ره‌تاى هه‌فته‌ى ڕابردوو بڵاویكرده‌وه ده‌بوو مووچه‌ى فه‌رمانبه‌رانى هه‌رێم دابه‌شبكرایه، به‌ڵام سه‌رچاوه‌یه‌كى وه‌زاره‌تى دارایی بۆ ده‌نگوباس ده‌ڵێت:"وه‌زاره‌تى دارایی عێراق پێى وتووین، هه‌تا داهاتى ناوخۆ نه‌گێڕنه‌وه، چاوه‌ڕوانى یه‌ك دینار مه‌بن"، سه‌رچاوه‌كه ده‌ڵێت:"به‌ئه‌گه‌رێكى زۆره‌وه، سبه‌ینێ ئێواره‌كه‌ى، هه‌رێم به‌شێك له‌داهاته‌كه‌ى بۆ به‌غدا بگێڕێته‌وه".
به‌گوێره‌ى وته‌ى سه‌رچاوه‌یه‌ك له‌وه‌زاره‌تى دارایی هه‌رێم كه بۆ ده‌نگوباس قسه‌یكرد ڕایگه‌یاند، به‌فه‌رمى وه‌زاره‌تى دارایی عێراق، وه‌زاره‌تى دارایی هه‌رێمى ئاگاداركردووه‌ته‌وه، هه‌تا ئه‌وكاته‌ى 50%ى داهاتى ناوخۆ نه‌گێڕنه‌وه، چاوه‌ڕوانى ناردنى مووچه‌ى فه‌رمانبه‌ران مه‌بن.
به‌وته‌ى سه‌رچاوه‌كه‌ى وه‌زاره‌تى دارایی هه‌رێم، ئه‌گه‌رى زۆره سبه‌ینێ ئێواره، حكومه‌تى هه‌رێم به‌فه‌رمى به‌شێك له‌داهاته‌كه‌ى كه تائێستا نازانرێت بڕه‌كه‌ى چه‌نده، بگه‌ڕێنێته‌وه بۆ وه‌زاره‌تى دارایی عێراق.
ئه‌مه‌ش له‌كاتێكدایه سه‌ره‌تاى هه‌فته‌ى ڕابردوو میدیاى پارتى له‌زارى سه‌رچاوه‌یه‌كى حكومه‌تى هه‌رێمه‌وه ئاشكرایكردبوو، ڕۆژى 10ى 11ى 2024 مووچه له‌به‌غداوه ده‌گات‌و ڕاسته‌وخۆ ده‌ست به‌دابه‌شكردنى ده‌كرێت.
سه‌رچاوه‌كه‌ى ده‌نگوباس ئه‌وه‌شى وت:"ئه‌گه‌ر ئێواره‌ى سبه‌ینێ حكومه‌تى هه‌رێم به‌شێك له‌داهاته‌كه‌ى بۆ به‌غدا نه‌گێڕێته‌وه، ئه‌وا ڕۆژى دووشه‌ممه، شاندێك ڕه‌وانه‌ى به‌غدا ده‌كات بۆ گفتوگۆ له‌باره‌ى ناردنى مووچه‌ى فه‌رمانبه‌رانى هه‌رێمه‌وه".
هه‌ر سه‌باره‌ت به‌مووچه‌ى فه‌رمانبه‌رانى هه‌رێم پێشه‌وا هه‌ورامانى وته‌بێژى حكومه‌تى هه‌رێم ڕایگه‌یاند، "له‌كۆبوونه‌وه‌ى نێوان سه‌رۆك وه‌زیرانى عێراق مه‌سرور بارزانیدا، سوودانى به‌ڵێنیداوه مووچه‌ى مانگه‌كانى 10 و 11و 12 ڕه‌وانه‌ى هه‌رێم بكات به‌بێ هیچ گرفتێك".
به‌وته‌ى پێشه‌وا هه‌ورامانى، "به‌ڵام نازانرێت دابه‌شكردنى مووچه‌ى مانگى 10 ده‌كه‌وێته پێش سه‌رژمێریى‌و پشووه‌كانى یان دواتر پاره‌كه ده‌گات‌و دابه‌شكردنى مووچه ده‌ستپێده‌كات".
#مووچە