دەنگوباس
دەستشکاندنەوەی بافڵ تاڵەبانی، سەرۆکی یەکێتیی نیشتمانیی کوردستان و مەسرور بارزانی، سەرۆك وەزیرانی هەرێمی کوردستان گەیشتووەتە لوتکە، یەکەمیان دژی هەژماری منە، دووەمیان هەموو وەزارەتەکانی کردووە بە گژ یەکێتیدا بۆئەوەی لە بڕیاری بەبانکیکردنی مووچە لەڕێگەی بەغداوە پاشگەز ببێتەوە.

تا ئێستا دیار نییە یەکێتی ئەو هەنگاوەی ناویەتی بە ڕاستیەتی یان فشارە بۆ پێکهێنانی کابینەی نوێی حکومەتی هەرێمی کوردستان، بۆئەوەی لەبەرامبەر ئەوەدا زۆرترین دەستکەوت بەدەست بهێنێت.

پرسی بە بانکیکردنی مووچەی فەرمانبەرانی سلێمانی تەنیا لە میدیاکانی یەکێتیەوە ڕەواجی هەیە، ئەگەر نا قوباد تاڵەبانی، کە جێگری سەرۆك وەزیران و سەرۆکی تیمی یەکێتیە لە حکومەت، نە بە باش نە بە خراپ باسی پڕۆژەکە ناکات.

لە دواین ڕۆژەکانی بانگەشەی هەڵبژاردنی پەرلەمانی کوردستان، یەکێتیی نیشتمانیی کوردستان لەزاری بافڵ تاڵەبانی سەرۆکی ئەو حزبەوە، کۆتاییهاتنی پڕۆسەی هەژماری منی لە سنوری سلێمانی و هەڵەبجە و ئیدارە سەربەخۆکان ڕاگەیاند، بەڵام ئەوەی بۆ بابەتەکە بووەتە پرسیار ئەوەیە، بۆچی بەغدا تا ئێستا هەڵوێستی ئاشکرا نەکردووە، کە ئاخۆ لەگەڵ بەبانکیکردنی مووچەی مووچەخۆرانی پارێزگاکانی ژێر دەسەڵاتی یەکێتیدایە یاخود نا.

بەغدا تا ئێستا هەژماری منی ڕەتنەکردووەتەوە، عەلی عەلاق پارێزگاری بانکی ناوەندیی عێراق لە دواین لێدوانیدا باسی لەوەکرد، هەژماری من بەگوێرەی ستانداردەکانی بانکی ناوەندیی عێراق دەڕوات.

ئەوەی ئێستا پرسیارە ئەوەیە، ئاخۆ لە ڕووی ئیدارییەوە بەغدا دەچێتە ژێر باری دووجۆر لە سیستمی دابەشکردنی مووچە؟ بە ڕوونتر بڵێین بۆ هەولێر و دهۆك مووچە لە ڕێگەی هەژماری منەوە بنێرێت، بەڵام بۆ سلێمانی و هەڵەبجە لەڕێگەی بانکە فیدراڵییەکانەوە؟ ئەوە پێشهاتێکە حکومەتی عێراق هەم لە ڕووی ئیداریی، هەم لە ڕووی سیاسییەوە خۆی لێ بەدوور دەگرێت.

عێراق نزیکە لە هەڵبژاردنی پەرلەمان، لەم دۆخەدا کە سوننەکان کێشەی ناوخۆییان هەیە، هاوکات سودانی کە دەیەوێت خۆی بۆ ویلایەتێکی دیکەی سەرۆکایەتی ئەنجومەنی وەزیران کاندید بکاتەوە، ڕیسک بە پەیوەندییەکانی خۆی لەگەڵ پارتی ناکات و لەململانێی هەژماری من و بەبانکیکردن نابێتە لایەنگیری یەکێتی، چونکە دەزانێت یەکێتی لە هەموو بارودۆخێکدا خۆی بۆ شیعەکان یەکلاکردووەتەوە.

مەسعود حەیدەر، بریکاری وەزارەتی دارایی عێراق لە پشکی پارتی دەڵێت، هیچ دامودەزگایەکی فیدراڵی ناتوانێت راستەوخۆ مامەڵە لەگەڵ موچەخۆری هەرێمی کوردستان بکات.

بریکارەکەی وەزارەتی دارایی عێراق باسی لەوەشکردووە، بە پێی ماددەکانی 117 و 121 ی دەستووری عێراق، حکومەتی هەرێمی کوردستان بەرپرسە لە بەڕێوەبردن و حوکمڕانی هەرێمی کوردستان، هیچ دامودەزگایەکی فیدراڵی ناتوانێت راستەوخۆ مامەڵە لەگەڵ دانیشتووان یان مووچەخۆری هەرێمی کوردستان بکات.

شەوی ڕابردوو نوسراوێکی تەیف سامی، وەزیری دارایی عێراق بڵاوبووەوە کە هەرزوو دەرکەوت ساختەیە، لە نوسراوەکەدا ئامادەیی نیشانداوە بۆ کردنەوەی لقی بانکەکانی ڕەشید و ڕافدەین لە سلێمانی، بەمەبەستی تەوتینکردنی مووچەی فەرمانبەران.

سۆران عومەر، ئەندامی پەرلەمانی عێراق هەر زوو لەسەر نوسراوەکە قسەی خۆی کرد و وتی "تەوتین بەتەزویرکردن و بڵاوکردنەوەی وەڵامی نوسراوێکی بەندە ناکرێت، ئەو نوسراوەی بڵاوی دەکەنەوە گوایە لەسلێمانی تەوتین دەست پێدەکات، نوسراوی تەیف سامی ساختەکراوە و  لەگەڵیدا وەڵامی نوسراوێکی بەندەش تەزویرکراوە".

ئێستا هەژماری من کێشەیەکی گەورەی بۆ حکومەت دروستکردووە، مەسرور بارزانی وەزارەتەکانی ناوخۆ، دارایی و ئەنجومەنی وەزیران و داواکاری گشتی کردووە بەگژ ئەو کەس و لایەنانەی دژی هەژماری منن لە سلێمانی. بەڵام یەکێتی هێشتا بێدەنگیی هەڵبژاردووە و بە فەرمی بەرەی دژە هەژماری من ڕاناگەیەنێت.

یەکێتی بەر لە هەڵبژاردنی پەرلەمانی عێراق لەبەردەم ئاڵنگارییەکی قورسدایە، ئەگەر هەژماری من سەربگرێت، لە بانگەشەی هەڵبژاردنی پەرلەمانی عێراق ڕکابەرەکەی کە پارتییە، وەك دەستکەوتێک بۆ خۆی و شکستێکیش بۆ یەکێتی باسی هەژماری من دەکات.