دەنگوباس
سەرۆکی گشتیی پارتی بزووتنەوەی نەتەوەیی تورکیا داوا دەکات، عەبدوڵا ئۆجەلان بچێتە پەرلەمان و لەوێوە رایبگەیەنێت کە پەکەکەی هەڵوەشاندووەتەوە.
دەوڵەت باخچەلی، سەرۆکی گشتیی پارتی بزووتنەوەی نەتەوەیی تورکیا لە میانی کۆبوونەوەی فراکسیۆنی پارتەکەی لە پەرلەمانی تورکیا وتارێکی پێشکەشکرد و جەختی لەوەکردەوە، پرۆسەیەکی نوێی چارەسەریی لە ئارادا نییە.
باخچەلی لەبارەی بانگەوازەکەی هەفتەی رابردووی تونجەر باکرهان، کە رایگەیاند، گۆشەگیریی لەسەر ئۆجەلان هەڵگرن تاوەکو بزانن بۆچوونی چییە، رایگەیاند: "نەک هەر ئەوە با ئۆجەلان بێت و لە کۆبوونەوەی فراکسیۆنی پارتی دەم رایبگەیەنێت کە پەکەکەی هەڵوەشاندووەتەوە و چەکی فڕێداوە".
باخچەلی وتیشی: "نە پێویستمان بە قەندیل هەیە نە بە ئەدێرنە بۆ ئەم بابەتە".
هەفتەی رابردوو باخچەلی رایگەیاند: "کاتێک ئۆجەلان هێنرایەوە بۆ تورکیا، ئامادەیی خۆی بۆ هەموو هاوکارییەک دەربڕی. کەواتە با بفەرموێت و چەکدانانی پەکەکە رابگەیەنێت".
دواتر تونجەر باکرهان، هاوسەرۆکی پارتی دەم رایگەیاند: "گۆشەگیریی لەسەر ئۆجەلان هەڵگرن با بزانین بۆچوونی چییە".