دەنگوباس
وەزارەتی پێشمەرگە رایگەیاند، سبەی دووشەممە هاوکاریی دارایی هێزەکانی هاوپەیمانان بۆ پێشمەرگە دابەشدەکرێت.

وەزارەتی پێشمەرگە لە راگەیەندراوێکدا بڵاویکردەوە، دوای ئەوەی هاوکاریی هێزەکانی هاوپەیمانان بۆ هێزی پێشمەرگە خرایەسەر هەژماری وەزارەتی پێشمەرگە، بەڕێوەبەرایەتیی گشتیی بودجە و بەرنامەکان 'ژمێریاریی سەربازیی'، رێکارە دارایی و ژمێریارییەکانیان بۆ دابەشکردنی هاوکارییەکە ئەنجامداون.

ئاماژەی بەوەشکردووە، سبەی دووشەممە 9ـی ئەیلولی 2024، ئەو هاوکارییە بۆ مانگی 8ـی 2024 دابەشدەکرێت.

هاوپەیمانان مانگانە نزیکەی 15 ملیۆن دۆلار دەدەن بە وەزارەتی پێشمەرگە بۆ لیوا هاوبەشەکان، ئەوەش وەکو پشتیوانییەک بۆ پێشمەرگە و یەکخستنەوەی یەکجاریی هێزەکانی پێشمەرگە کە هەر پلەدار، پێشمەرگە و ئەفسەرێکی لیوا هاوبەشەکانى سەربە وەزارەتی پێشمەرگە بڕی 432 هەزار دینار وەردەگرێت.