ده‌نگوباس:

سەرۆکی فراکسیۆنی پارتی لەئەنجوومەنی پارێزگای نەینەوا، ئاشكرایكرد، پارتى دیموكراتى كوردستان بڕیاریداوه‌ له‌حكومه‌تى خۆجێى نه‌ینه‌وادا ببێته‌ ئۆپۆزسیۆن، ده‌شڵێت:"ئەوانەی لەئەنجوومەنی پارێزگای نەینەوا دەسەڵاتدارن، دەیانەوێت پارێزگاکە تێکبدەن‌و پێکەوەژیان نەهێڵن".

ئەحمەد کەنعان کیکی سەرۆکی فراکسیۆنی پارتی لەئەنجوومەنی پارێزگای نەینەوا ئاشكرایكرد، پارتی‌و چەند هێزێکی دیکەی ناو ئەنجوومەنی پارێزگای نەینەوا کە ژمارەی کورسییەکانیان 13 کورسییە دەبنە ئۆپۆزسیۆن‌و کارەکانی ئەنجوومەنی پارێزگای نەینەوا ڕەتدەکەنەوە.

ڕاشیگەیاند، ئەوانەی لەئەنجوومەنی پارێزگای نەینەوا دەسەڵاتدارن دەیانەوێت پارێزگاکە تێکبدەن‌و پێکەوەژیان نەهێڵن، تا ئەوانیش لەدەسەڵات بن ناگەڕێنەوە ناو ئەنجوومەنی پارێزگا.

وته‌كانى كیكى له‌كاتێكدایه‌، ڕۆژی 2ی تەمموزی 2024 ئەنجوومەنی پارێزگای نەینەوا بەبێ ئامادەبوونی ئەندامانی فراکسیۆنەکانی پارتی‌و نەینەوای یەکگرتوو، ژمارەیەک قائیمقام‌و بەڕێوەبەری ناحییەکانی سنووری پارێزگای نەینەوایان گۆڕی کە بەشێک لەو ناوچانە زۆرینەی دانیشتووانەکەی کوردن‌و دەکەونە سنووری ناوچە کوردستانییەکانی دەرەوەی ئیدارەی هەرێمی کوردستان.

هاوکات فراکسیۆنی پارتی‌و نەینەوای یەکگرتوو بایکۆتی کۆبوونەوەکەیان کردو ئەندامێتیی خۆیان لەئەنجوومەنی پارێزگای نەینەوا هەڵپەسارد.

ئەنجوومەنی پارێزگای نەینەوا لە 29 کورسی پێکدێت، بۆ دوو هاوپەیمانی سەرەکیی دابەشدەبێت، هاوپەیمانیی نەینەوای یەکگرتوو کە 13 کورسیی هەیە، پارتی دیموکراتی کوردستانیشی تێدایە، لەگەڵ هاوپەیمانیێتی نەینەوای داهاتوو کە هێزەکانی چوارچێوەی هاوئاهەنگیی تێدایەو 16 کورسییان هەیە.