ده‌نگوباس:

سەرۆکی فراکسیۆنی پارتی دیموکراتی کوردستان لەئەنجوومەنی پارێزگای نەینەوا ئاشكرایكرد، بۆ بەڕێوەچوونی کۆبوونەوەکانی ئەنجوومەن پێویستیان بەبەشداریی فراکسیۆنی ئه‌وان ده‌بێت، ده‌شڵێت:"بەڵام تاڕێککەوتنێکی نوێی سیاسیی نەکرێت، بەشداریی ھیچ کۆبوونەوەیەک ناکەین".

ئەحمەد کەنعان کیکی سەرۆکی فراکسیۆنی پارتی لەئەنجوومەنی پارێزگای نەینەوا له‌ڕێگه‌ى میدیاى حزبه‌كه‌یه‌وه‌ ده‌ڵێت:"لایەنەکانی بەشدار لەحکوومەتی خۆجێیی پارێزگای نەینەوا، ھەموو ھەوڵێکیاندا بۆ ئەوەی نیسابی یاسایی کۆبوونەوەی ئەنجوومەن تەواو بکرێت‌و کۆبوونەوە بکەن، بەڵام سەرکەوتوو نەبوون، چونکە تەنها 13 ئەندامی ئەنجوومەن ئامادەبوون، لەکاتێکدا پێویستە 16 ئەندام ئامادەبن".

به‌وته‌ى كیكى، "ھەرچەندە ھەڕەشە لەئەندامانی ئامادەنەبوو کراوە، ئەگەر ئامادەی کۆبوونەوە نەبن کەسانی دیکە لەشوێنیان دادەنرێت، بەڵام ئەوە ناکرێت، چونکە ئەو ئەندامانە خەڵک دەنگی پێداون، کەس ناتوانێت لایان بدات، ئێمە بەدوو مەرج بەشداریی کۆبوونەوەی ئەنجوومەن دەکەینەوە، یەکەمیان لادانی سەرۆکی ئەنجوومەن‌و جێگرەکەی، دووەمیش ڕێککەوتنێکی نوێی سیاسیی لەپارێزگای نەینەوا بکرێت".

وته‌كانى كیكى بۆ میدیاى حزبه‌كه‌ى له‌كاتێكدایه‌، ڕۆژی دووى ته‌مموزى ئه‌مساڵ، ئەنجوومەنی پارێزگای نەینەوا بەبێ ئامادەبوونی ئەندامانی فراکسیۆنەکانی پارتی‌و نەینەوای یەکگرتوو، ژمارەیەک قائیمقام‌و بەڕێوەبەری ناحییەکانی سنووری پارێزگای نەینەوایان گۆڕی کە بەشێک لەو ناوچانە زۆرینەی دانیشتووانەکەی کوردن‌و دەکەونە سنووری ناوچە کوردستانییەکانی دەرەوەی ئیدارەی هەرێمی کوردستان، به‌ڵام فراکسیۆنی پارتی‌و نەینەوای یەکگرتوو بایکۆتی کۆبوونەوەکەیان کردو ئەندامێتیی خۆیان لەئەنجوومەنی پارێزگای نەینەوا هەڵپەسارد.

ئەنجوومەنی پارێزگای نەینەوا لە 29 کورسی پێکدێت، بۆ دوو هاوپەیمانی سەرەکیی دابەشدەبێت، هاوپەیمانیی نەینەوای یەکگرتوو کە 13 کورسیی هەیە، پارتی دیموکراتی کوردستانیشی تێدایە، لەگەڵ هاوپەیمانیێتی نەینەوای داهاتوو کە هێزەکانی چوارچێوەی هاوئاهەنگیی تێدایەو 16 کورسییان هەیە.