ده‌نگوباس:

لەکۆبوونەوەیەکدا، دەربارەی چارەکردنی هەڕەشەکانی ئەلیکترۆنی دژ بەكاندیده‌كان بۆ هەڵبژاردنی پەرلەمانی کوردستان کە کونسوڵخانەی بەریتانیا لەهەولێر ڕێكیخست، ڕێبەر ئەحمەد وەزیری ناوخۆى هه‌رێم ئاشكرایكرد، دامەزراوەکانی ئاسایش بەهاوئاهەنگی لەگەڵ وەزارەتی ناوخۆو پۆلیس، دەستیان بەسەر زیاتر لە 20 هەزار سیمکارتی بێ مۆڵەتدا گرتووه‌.

ڕێبەر ئەحمەد زانیاریى گرنگى ئاشكراكردو وتى:"ئه‌و سیم كارتانه‌ بۆ کاری هەڕەشەکردنی ئەلیکترۆنی بەکارهێنراون‌و دەیان شوێنی فرۆشتنی ئەو سیمکارتە بێمۆڵەتانەمان داخستووە".

ئاماژەی بەدەستبەسەرداگرتنی 110 کۆمپیوتەریش کرد کە بۆ هەڕەشەکردن‌و بێزارکردنی ئافرەتان بەکارهێنراون‌و پڕبوونە لەوێنەو ڤیدیۆو نامە کە ئافرەتانیان پێ ناچارکراوە، یاخود بەپێچەوانەش ئافرەتان بەو ئامێرو هۆکارانە هەڕەشەیان لەپیاوان کردووە.

دەشڵێت:"بەهۆی ئەوەوە ئافرەتان زیاتر لەپیاوان هەڕەشەیان لێکراوە".

وەزیری ناوخۆ ئاشکرایکرد، "چەندین ئافرەتیان لەکووشتن پاراستووە کە بەهۆی ئەو هەڕەشە ئەلیکترۆنیانەوە دووچاری بوونەتەوە، زۆرجار، ئافرەتان بەهۆی نامەیەک یاخود زەردەخەنەیەک دووچاری کێشەی گەورە بوونەتەوە بێئەوەی هەستی پێبکەن، بۆیە هێزە ئەمنییەکان توانیوویانە ئەو ئافرەتانە بپارێزن‌و تاوانباریش بداتە دادگا".

وەزارەتی ناوخۆی حکوومەتی هەرێمی کوردستان ساڵی 2024 بڕیاریدا، کۆمپانیاکان‌و بریکارەکانی فرۆشتنی سیمکارتی ئاگادارکردەوە، سیمکارتەکانیان بەشێوەیەکی یاسایی بفرۆشن، ئەو بڕیاڕەش لەپێناو ڕێگریی لەخراپ بەکارهێنانی ئامێرەکانی پەیوەندیی‌و تاوانە ئەلیکترۆنییەکان دەرکرا.