دەنگوباس
بەشی ڕۆشنبیریی و ڕاگەیاندنی پارتی دیموكراتی كوردستان ڕایدەگەیەنێت، فرمێسكی تیمساحی یەكێتی بۆ ئێزدییەكان، ئەو راستیە ناگۆڕێت تەنيا پارتی لە خەمی ئێزدییەكانە.
لە بەشی ڕۆشنبیریی و ڕاگەیاندنی پارتی دیموكراتی كوردستان لە ڕاگەیەنراوێکدا دەڵێت، لە یادی دەساڵەی كارەساتی شنگالدا مەكتەبی سیاسی یەكێتیی نیشتیمانی بەیاننامەیەكی بڵاوكردووەتەوە تێیدا فرمێسكی تیمساحی بۆ كەسوكاری قوربانیانی ئەو كارەساتە ڕشتووە و هەوڵی داوە ئەو كارەساتە نیشتیمانی و نەتەوەییە بۆ مەرامە بەرتەسكە سیاسیە و حزبیەكانی خۆی بقۆزێتەوە و ڕاستییەكانی ئەو كارەساتە بشێوێنێت.
دەشڵێت "هەموو خەڵكی كوردستان و تێكۆشەر و خەباتگێڕان و هێزی هاوپەیمانان شاهیدی ئەوەن، كە ئەوەی لە شنگالدا خوێن و قوربانی و زیانی دا پارتی دیموكراتی كوردستان بووە. لە حوزنێكی گەورەی نیشتیمانی وەك كارەساتی شنگال، پارتی وەك هەمووجار بە تەنیا مایەوە و بەتەنیا شانی دایە بەر بەرپرسیارێتی، چ لە پەنادانی ئاوارەكان، چ لە ڕزگاركردنی ڕفێندراوەكان و هەروەها ڕزگاركردنی دەڤەری شنگال لە دەستی داعش".
ئەو ئۆرگانەی پارتی ئەوەشی خستوەتەڕوو، جیهان شاهیدە پێشمەرگەی پارتی چۆن بەرگریی کردووە و چۆن ئەفسانەی داعشی شکاندووە. مێژوویەکی زۆر کۆن نیە، گەلی کوردستان باش لەیادیەتی بۆ تۆماركردنی داستانی گەورە لە ئۆپەراسیۆنەكانی ئازادكردنی سەددی موسڵ و ئازادكردنی ڕەبیعە و ئازادكردنی زووماڕ و شكاندنی ئابڵۆقەی چیای شنگال و دواجاریش ڕزگاركردنی شنگال لە دەستی تیرۆریستانی داعش، سەدان شەهید و برینداری بەخشی و ماوەی دووساڵ سەرۆك بارزانی خۆی لە بەرەكانی شەڕ مایەوە و هەتا شنگال ئازاد نەكرا، نەگەڕایەوە. سەرۆك بارزانی ئەو بەڵێنەی گەیاندەسەر، كە بە بابەشێخ و ئێزیدیەكانی دابوو، كە ئێزیدخان دەمێنێ و سەری داعش دەبێ بكەوێتە ژێر پێی ڕۆڵەكانی كوردی ئێزیدی.
باس لەوەشکراوە، لێرەدا ڕایدەگەیێنین موزایەدات و ڕشتنی فرمێسكی تیمساح بۆ ئێزیدیەكان و چەواشەكاری هیچ لە وێنەی ڕاستییەكان ناگۆڕێت، بە تایبەت کە ئەو موزایەداتە لەلایەن ناپاک و کاڵفامەکانەوە بێت. وەک ڕۆژی ڕووناک دیارە ئەوەی لە خەمی شنگالە و خاوەنی شنگالە و ئاوێتەیە لەگەڵ ژان و ئازاری خوشك و برایانی ئێزیدی تەنیا پارتی بووە و هەر پارتی دەمێنێتەوە.
#باشووری_کوردستان
#پارتی دیموکراتی کوردستان
#یەکێتیی نیشتمانیی کوردستان