دەنگوباس
فەرمانگەکانی پشتی دادگای سلێمانی دەگوازرێنەوە و شوێنەکەیان دەکرێت بە پارک و بازاڕ.
عەزیز سەعید، بەڕێوەبەری گشتیی وەبەرهێنانی سلێمانی و ئەندامی ئەنجوومەنی شارەوانیی سلێمانی بە کەناڵ8ـی راگەیاند، لە کۆبوونەوەی دوێنێی ئەنجوومەنی شارەوانی، تاوتوێی رێكخستن و گواستنەوەی هەندێك لە فەرمانگەكانی شەقامی پشتی دادگای كۆنی سلێمانی كرا بە تایبەتی گواستنەوەی پزیشكیی دادی سلێمانی، نەخۆشخانەی منداڵبوون و نەخۆشخانەی سووتاوی – ئیمێرجینسی بۆ ئەوەی قەرەباڵغی و ئاستەنگیی هاتوچۆی ئەو ناوچەیە كەمتر بكرێتەوە.
وتیشی، لە کۆبوونەوەکەدا بڕیاردراوە ئەو فەرمانگانە بگوازرێنەوە، بەڵام تاوەکو ئێستا شوێنیان بۆ دیاری نەکراوە و لە شوێنی ئەوانە پارک و بازاڕ دروستبکرێن.
بەڕێوەبەری گشتیی وەبەرهێنانی سلێمانی ئاماژەی بەوەشکرد، ئێستا ئەو پرۆژەیە لە قۆناغی دیزاینکردندایە و لەسەر بودجەی وەبەرهێنان جێبەجێدەکرێت، ئەو وەبەرهێنەی پرۆژەکەی بۆ دەردەچێت، لەبەرامبەر جێبەجێکردنیدا زەوی پێدەدرێت، وەک ئەو پرۆژانەی دیکەی سلێمانی کە لەماوەی رابردوودا جێبەجێکراون.

#سلێمانی