دەنگوباس
بەگوێرەی ئەنجامی راپرسییەک کە لە ئێران ئەنجامدراوە، پێشبینیکراوە رێژەی بەشداریی لە گەڕی دووەمی هەڵبژاردنی سەرۆک کۆماری ئەو وڵاتە، نزیک ببێتەوە لە 45٪ و مەسعود پزیشکیانیش زۆرترین دەنگ بەدەستدەهێنێت، هاوکات سبەینێ هەینی گەڕی دووەمی هەڵبژاردنی سەرۆکایەتی ئێران بەڕێوەدەچێت.
 
ئەمڕۆ پێنجشەممە ناوەندی راپرسیی خوێندکارانی ئێران کە بە ئیسپا ناسراوە، نوێترین ئەنجامی راپرسی لەبارەی گەڕی دووەمی 14ـەمین خولی هەڵبژاردنی سەرۆک کۆماریی ئێران بڵاوکردەوە و بەپێی ئەنجامی راپرسییەکەش مەسعود پزیشکیان، کاندیدی ریفۆرمخواز زۆرترین دەنگ بەدەستدەهێنێت و دەبێتە سەرۆک کۆمار.
 
بەپێی ئەنجامی راپرسییەکە، 49.5٪ـی بەشداربووان دەنگ بە مەسعود پزیشیکیان، کاندیدی ریفۆرمخوازان دەدەن، لە بەرامبەریشدا 43.9٪ـی بەشداربووان رایانگەیاندووە، دەنگ بە سەعید جەلیلیی نەریتخواز دەدەن.
 
ناوەندی ئیسپا دەڵێت، 4.8٪ـی بەشداربووانی راپرسییەکە دەڵێن، هێشتا بڕیاریان نەداوە دەنگ بە کام کاندید دەدەن، هەروەها 1.8٪ـی دیکە وەڵامی ئەو پرسیارەیان نەداوەتەوە کە دەنگ بە کێ دەدەن.


#ئێران