دەنگوباس
دوای شەش ساڵ مەسعود بارزانی، سەرۆكی پارتی دیموکراتی کوردستان ڕۆژی چوارشەممە سەردانی شاری بەغدا دەکات.
ڕۆژنامەی شەرقولئەوسەت لە ژمارەی ئەمڕۆیدا بڵاویکردەوە، سەردانەکەی بارزانی بۆ بەغدا رەنگدانەوەی باشبوونەوەی پەیوەندییەکانی نێوان پارتی دیموکراتی کوردستان و دادگای فیدراڵیی عێراق و دەسەڵاتی دادوەریی عێراقە، بەتایبەت کە پەیوەندییەکانیان بەردەوام ڕووی لە خراپیی کردووە.
بارزانی لە بەغدا چاوی بە فایەق زێدان دەکەوێت، ئەو پیاوەی سەرۆکی دەسەڵاتی دادوەریی عێراقە و ئێستا لە کۆنگرێسی ئەمریکاوە هەوڵێک هەیە بۆ سزادانی، ئەوەش بە بیانووی ئەوەی پەیوەندیی لەگەڵ ئێران هەیە. بۆیە کۆبوونەوەی بارزانی و فایەق زێدان دانپێدانانی بارزانی و پارتیە بەو دادگایەی پێشتر پێیان دەوت دادگای سەورە (شۆڕش).
هەریەکە لە د. لەتیف ڕەشید، سەرۆك کۆماری عێراق، نێچیرڤان بارزانی، سەرۆکی هەرێمی کوردستان، وەزارەتی دەرەوەی عێراق، بافڵ تاڵەبانی، سەرۆکی یەکێتیی نیشتمانیی کوردستان لە دیارترین ئەو کەس و لایەنانە بوون کە ڕایانگەیاند، هێرشکردنەسەر فایەق زێدان و لێدان لە کەسایەتییەکەی ڕەتدەکەنەوە، لەلایەن هەر کەس و لایەنێك بێت.
بۆیە چاوەڕواندەکرێت بارزانی لەو سەردانەی بۆ بەغدا، بچێتە ئەو بەرەیەی بەناوی بەرەی ئێران ناسراون، بەتایبەت لەدوای ئەوەی مانگی ڕابردوو پارتی پەیوەندییەکانی لەگەڵ تاران ئاسایی کردەوە.
مایك واڵتز، ئەندامی كۆنگرێسی ئەمەریكا پڕۆژە یاسایەكی پێشكەشكردووە بۆ تۆمەتباركردنی فائق زێدان، سەرۆكی ئەنجومەنی باڵای دادوەری عێراق‌و بەوە تۆمەتباری كردووە كە لەخزمەتی ئێراندا كار دەكات.
#پارتی دیموکراتی کوردستان