دەنگوباس
ناکۆکی، دەمەقاڵێ و شەڕی دەستەویەخە. ئەمە سیمای نوێترین کۆنفرانسی نێوخۆیی پارتی دیموکراتی کوردستان بوو، کۆنفرانسەکە بۆ هەندێک کادر مایەی ڕق و بێزاریی و توڕەیی بوو، بۆ هەندێكی دیکەش کە لە ئاڕاستە دەسەڵاتدارەکەی پارتیەوە نزیکن، مایەی دڵخۆشیی بوو.
لە کۆنفرانسەکانی پارتی چی ڕوویدا؟
لەماوەی سێ ڕۆژی ڕابردوودا لە سنووری لق و ناوچەجیاوازەكانی پارتی كۆنفرانسی ناوخۆیی بەڕێوەچوو، بەڵام هەر لەگەڵ سەرەتای دەنگدان و بەشداریی کادران بۆ هەڵبژاردنی بەرپرسەکانیان پێشێلكاری گەورە ڕوویداو و گەیشتە ئاستێکی شەڕی دەستەویەخەش تیایدا ڕوویدا.
لەنێو کۆنفرانسەکان لیستی ناو ئامادەکرابوو، کە هەڵبەت لیستەکە لەلایەن مەکتەبی ڕێکخستنەوە ئامادەکرابوو، ئەو کەسانەی نزیک بوون لە ناوەندی بڕیاردانی پارتی گڵۆپی سەوزی دەرچونیان بۆ هەڵکرابوو، بەڵام هەندێك کاندیدی دیکە کە وەك خۆیان دەڵێن، لە چالاکترین کادرەکانی حزبەکەیان بوون، پەراوێز خران.
کۆنفرانسەکە چۆن دابەشکرابوو؟
پارتی دیموکراتی کوردستان کە لەم چەند مانگەی دوایدا بەردەوام دروشمێك هەبوو دەیوتەوە، ئەویش ئەوەبوو (دژی دیزاینکردنی پێشوەختەی هەڵبژاردنین) بەڵام هەر خودی ئەو حزبە لە هەڵبژاردنە نێوخۆییەکانیدا پێشتر دیزاینێکی ئامادەکراوی هەبوو، کاتێکیش کۆنفرانس دەستیپێکرد دیزاینەکە برایە هۆڵەکانی دەنگدانەوە.
دیزاینەکەی پارتی بەشێوەیەک بوو، هەر کەسێك لە ئاڕاستەکەی مەسرور بارزانی جێگری سەرۆکی پارتی نزیک بووە، چانسی سەرکەوتنی مسۆگەر بووە، هەر کامێك لە کاندیدەکانیش لە ئاڕاستەکەی نێچیرڤان بارزانی نزیك بوبن، تەنیا ماندوبون و گەرمای تاقەتپڕوکێنی هاوینیان بۆ ماوەتەوە.
عەشیرەت و بنەماڵە بەهەمانشێوە ڕۆڵیان هەبوو لە یەکلاکردنەوەی کاندیدەکان و ئەوانەی لەو دوو لایەنەوە نزیکبوون، یاخود سەر بەو دوو لایەنە بوون، چانسی دەرچونیان مسۆگەر بووە.
لە سنووری گەرمیان بەهۆی ئەنجامەکانی کۆنفرانسەوە شەڕی دەستەویەخە ڕوویداوە و بووە هۆی ئەوەی چەند بنەماڵەیەك لەیەك زویر ببن و ناکۆکییان بۆ دروست ببێت، لە شارەزووریش بنەماڵەیەكی گەورەی وەك تاوگۆزی، بەسەدان ئەندامیان وازهێنانیان لە ڕیزەكانی پارتی ڕاگەیاند.
لەسنوری پارێزگای سلێمانی ناکۆکییەکان قوڵتر بوونەوە، لە قەزای پێنجوێن و ناحیەی سیروانیش بەهەمان شێوەی خورماڵ و هەڵەبجە پێشێلكاری كراوە، ئەوەش وایکرد ژمارەیەك کادر و ئەندامی پارتی وازهێنانی خۆیان لە حزبەکەیان ڕابگەیەنن.
ئەو پێشهاتە لەکاتێکدایە، پارتی دیموکراتی کوردستان کەمتر لە چوار مانگی بۆ هەڵبژاردنی پەرلەمانی کوردستان ماوە، لەسنوری پارێزگای سلێمانی ئەو حزبە دەنگدەری خۆی هەیە، بۆیە پێدەچێت ئەنجامەکانی کۆنفرانسی پارتی، ببێتە هۆی دەرکەوتنی ئەنجامی پێشوەختەی هەڵبژاردنی پەرلەمانی کوردستانیش بۆ ئەو حزبە.
ناکۆکییەکان درێژەیان هەیە، ئەمڕۆ شەممە لەناوچەی بەردەڕەشی پارتی شەڕو پێکدادان لەنێوان کادرانی ئەو حزبە ڕوویدا، تا ساتی ئامادەکردنی ئەم ڕاپۆرتە ئێستا شەڕەکە بەردەوامە.
یەکێتی دەستی بە جووڵە کردووە
بەگوێرەی بەداوداچونێکی دەنگوباس، یەکێتیی نیشتمانیی کوردستان دەستی بە جووڵە کردووە و دەیەوێت وازهێنانی کادر و ئەندامانی پارتی بقۆزێتەوە، بۆ دەستکەوتی خۆی لە هەڵبژاردنی پەرلەمانی کوردستان.
هەر بەگوێرەی زانیارییەکانی دەنگوباس، لەچەند ناوچەیەکی پارێزگای سلێمانی قسە لەگەڵ ئەو کادرە باڵایانەی پارتی کراوە، کە کەسانی ناسراو و دەستڕۆیشتووی نێو بنەماڵەکانیانن، بۆئەوەی بە ئاشکرا و بە ئامادەبوونی میدیاکان، پەیوەندیکردنی خۆیان بە ڕیزەکانی یەکێتیەوە ڕابگەیەنن.
هاوکات لەسەر ئاستی میدیاییش، ڕاگەیاندنەکانی یەکێتی ئاگادار کراونەتەوە لەوەی گرنگیی بدەن بە بابەتی ناکۆکی و شەڕەکانی کۆنفرانسی نێوخۆیی پارتی.
هێشتا پارتی بێدەنگە
هەرچەندە ناکۆکییەکان بە ئاشکرا گەیشتووەتە میدیاکان و شەڕەکانیش لەڕێگەی گرتەی ڤیدیۆییەوە بڵاوبوونەتەوە، بەڵام مەکتەبی ڕێکخستنی پارتی و سەرکردایەتی ئەو حزبە تا ئێستا بێدەنگییان هەڵبژاردووە.
دەنگوباس بەدواداچوونی بۆ ئەو پرسە کرد و دەرکەوت، پارتی بڕیاریداوە لەپاش بڵاوبوونەوەی ئەنجامی کۆتایی کۆنفرانس، لەگەڵ کادر و ئەندامە ناڕازییەکان قسە بکرێت و لەڕێگەی هەندێك دەستکەوتەوە بێدەنگ بکرێن.
#پارتی دیموکراتی کوردستان