دەنگوباس:
وەزیری دادی عێراق نەھێشتنی ژووری VIP لە زیندانەکاندا ڕاگەیاند و ڕایگەیاند، ئێستا ھەموو زیندانییەکان ھاوشێوەی یەک مامەڵەیان لەگەڵ دەکرێت.

خالید شوانی، وەزیری دادی عێراق لە چاوپێکەوتنێکیدا لەگەڵ ئاژانسی ھەواڵی عێراق ڕایگەیاند: پێشتر لە زیندانەکانی عێراق، ژووری VIP و ھۆڵ و ژووری تایبەت بۆ زیندانی ھەبووە، بەڵام لە ئێستادا ھیچ کام لەو شوێنە تایبەتانە نەماون.

ئاماژەى بەوەشکرد، ناکرێت زیندانییەک گرنگی زیاتری پێبدرێت لە زیندانییەکانی دیکە، لەئێستادا تەواوی زیندانییەکان ھاوشێوەی یەک مامەڵەیان لەگەڵ دەکرێت.

وەزیری دادی عێراق وتیشی، زیندانییەکان بەپێی ستانداردی ڕێکخراوە نێودەوڵەتییەکان و دۆسیە و گروپی تەمەنیان پۆلێنکراون.