هەپەگە دەڵێت، سوپای توركیا لەماوەی نۆ رۆژدا 71 جار تونێلەكانی جەنگی لە شاخی ئێف ئێم لە رۆژئاوای زاپ لە باشوری كوردستان بە گازی كیمیاویی قەدەغەكراو بۆردومان كردون.

بەپێی راگەیەندراوەكانی رۆژانەی ناوەندی راگەیاندنی هێزەكانی پاراستنی گەل-هەپەگە، سوپای توركیا لەنێوان 30ی ئایار تاوەكو 7ی حوزەیرانی ئەمساڵ، 71 جار تونێلەكانی جەنگی لە شاخی ئێف ئێم لە رۆژئاوای زاپ بە گازی كیمیاویی قەدەغەكراو بۆردومان كردون.

لە راگەیەندراوەكانی هەپەگەدا هاتوە، رۆژانی 30 و 31ی ئایار و 1ی حوزەیران تونێلەکانمان 21 جار بە گازی کیمیاویی ژەهراوی لە گۆڕەپانی بەرخۆدانی شاخی ئێف ئێم لە هەرێمی شەهید دەلیل لە ڕۆژئاوای زاپ لەلایەن سوپای توركیاوە بۆردومان کران.

هەربەپێی راگەیەندراوەكان،  لە رۆژانی 2 و 3ی حوزەیران ئەو تونێلانە 27 جارو لە رۆژانی 4 و 5ی حوزەیران 13 جارو لە 6ی حوزەیران 7 جارو لە 7ی حوزەیران 3 جار ئەو تونێلانە لە شاخی ئێف ئێم لەلایەن سوپای توركیاوە بە گازی كیمیاویی بۆردومان كراون.


#تورکیا