دەنگوباس:
بەڕێوەبەرى گشتیی گومرگى هەرێمی کوردستان ڕایگەیاند، حكومەتی عێراق سەرقاڵی كردنەوەی سێ خاڵى پشکنینى گومرگییە لەنێوان هەرێمی كوردستان و شارەكانی عێراقدا.

ساماڵ عەبدولرەحمان بەڕێوەبەرى گشتیی گومرگى هەرێمی کوردستان ڕایگەیاندووە، حكومەتی عێراق سەرقاڵی كردنەوەی سێ خاڵى پشکنینى گومرگییە لەنێوان هەرێمی كوردستان و شارەكانی عێراقدا، ئەو دوو خاڵى پشکنینە یەکێکیان دەکەوێتە پارێزگاى موسڵ، نزیک لە دەروازەى سنووریى ئیبراهیم خەلیل و ئەوەى دیکە دەکەوێتە پارێزگاى دیالە لە نزیک مەرزى نێودەوڵەتى پەروێزخان.

وتیشی: دەبێت تەواوی ئەو كاڵایانەی لە تورکیا و ئێرانەوە هاوردە دەکرێن و دەنێردرێنە شارەكانی عێراق لە رێى هەردوو خاڵى "ئیراهیم خەلیل و پەروێزخان، حاجى ئۆمەران و باشماخ"، لەو دوو خاڵەى "موسڵ و دیالە" پشکنینى بۆ بکرێت دواتر ڕێگەپێدانى بۆ دەکرێت.

ئاماژەی بەوەش کردووە، ئەو هەنگاوەى حکومەتى فیدراڵى دروستکردنى فشارە، مەبەست لێى کەمکردنەوە و وشککردنى سەرچاوەى داهاتى گومرگى هەرێمى کوردستانە، بۆیە هەرێمی كوردستانیش هەنگاوەکان دەگرێتەبەر و لەگەڵ حکومەتى فیدراڵی گفتوگۆ لەسەر ئەو بابەتە دەکات.

#ئابووری
#باشووری کوردستان
#عێراق