دەنگوباس
دوکاندارانی ناوچەی هوانە دژی زیادکردنی کرێی دوکانەکانیان لەبەردەم شارەوانی کۆبوونەوە و دواتریش لەگەڵ لایەنی پەیوەندیداری شارەوانی گفتوگۆیان کرد.

لەپاش کۆبوونەوەیان لەگەڵ بەرپرسانی شارەوانی سلێمانی، دوکاندارانی ناوچەی هوانە بە ڕۆژنامەنووسانیان ڕاگەیاند، نزیکەی دوو هەزار دوکاندار ماوەی سێ ساڵە بەدەست زیادبوونی باج-ەوە دەناڵێنن.

بەوتەی دوکاندارەکان "پێشتر کرێی دوکانەکانیان 500 دینار بووە بۆ هەر مەترێک، ئێستا گەیشتووەتە 4000 دینار، بەوەش باج بەڕێژەی 800% زیادی کردووە".

ئەوان دەڵێن، پێشتر لەگەڵ ڕاوێژکارێکی قوباد تاڵەبانی، جێگری سەرۆك وەزیرانی عێراق گفتوگۆیان کردووە و بەڵێنیداوە کێشەکەیان بگەیەنێتە قوباد تاڵەبانی، هاوکات لەگەڵ بافڵ تاڵەبانی، سەرۆکی یەکێتیی نیشتمانیی کوردستان دوو ساڵ بەر لە ئێستا لەسەر هەمان کێشە کۆبوونەوە، بەڵام تا ئێستا کێشەکەیان بێ ئەنجام ماوەتەوە".
#سلێمانی