دەنگوباس
میلیشیا شیعەکانی عێراق ماوەی 40 ڕۆژ مۆڵەت دەدەنە محەمەد شیاع سودانی، سەرۆك وەزیرانی عێراق، بۆ کشانەوەی هێزەکانی ئەمریکای لە وڵات.

میدیای عێراقی بڵاویکردەوە، میلیشیا شیعەکان بە فەرمی بە سودانیان ڕاگەیاندووە، ئەگەر تا 40 ڕۆژی دیکە هێزەکانی ئەمریکا لە عێراق نەکشێنەوە، ئەوا هێرشەکانیان دژی ئەو هێزانە دەستپێدەکاتەوە.

نزیکەی پێنج مانگە میلیشیا شیعەکان هێرشەکانیان بۆسەر هێزەکانی ئەمریکا ڕاگرتووە، لەبەرامبەریشدا ئەمریکا هیچ هێرشێکی بۆسەر ئەو میلیشیایانە ئەنجام نەداوە.

هاوکات ئەو میلشیایانە داوایانکردووە، سودانی خشتەیەکی زەمەنیی ئاشکرا بۆ کشانەوەی هێزەکانی ئەمریکا لە عێراق دابنێت، بە ڕوونیش جێبەجێ بکرێت.

دوای ئەوەی لە هێرشێکی فرۆكەیەكی بێفرۆكەواندا سێ‌ سەربازی ئەمریكی لە ئوردن كوژران، ئەمریکا دوای چەند ڕۆژێك لەو هێرشە بە تووندی هاتەسەرخەت و لەوەڵامدا، ژمارەیەك پێگەو سەركردەكانی میلیشیا شیعەکانی لە سوریاو عێراق كردە ئامانج، بەهۆیەوە چەند سەرکردەیەکی ئەو میلیشیایانە کوژران.
  
مۆڵەتی ئەو میلیشیایانە بۆ سودانی تا ناوەڕاستی مانگی تەمموزی داهاتووە، هاوکات لەگەڵ مۆڵەتەکەدا هێرشکردنەسەر بەرژەوەندییە ئابوورییەکانی ئەمریکا لە عێراق، کە خۆی لە چەندین زنجیرە ڕێستۆرانتدا دەبینێتەوە دەستیپێکردووە.

ئەمریکا تا ئێستا بێدەنگیی هەڵبژاردووە، بەشێکی بەهۆی دواین لێکتێگەیشتنی نێوان بەغدا و واشنتۆنە کە لەسەردانەکەی سودانی بۆ ئەمریکا بەدەستهات، بەشێکی دیکەشی بەهۆی نزیکبوونەوەی هەڵبژاردنی سەرۆکایەتی ئەمریکایە.

میلیشیا شیعەکان کاتێکی گونجاویان بۆ ئەو فشارە نوێیانە هەڵبژاردووە کە نزیکبوونەوەیە لە هەڵبژاردنی سەرۆکایەتی ئەمریکا و دەزانن جۆ بایدن، سەرۆکی ئەمریکا ڕەنگە نەیەوێت دەرگای ململانێیەکی نوێ بکاتەوە، ئەویش بەهۆی ئەوەی ڕکابەرەکەی کە دۆناڵد ترەمپە، وەك چەکێک لە بانگەشەی هەڵبژاردن ئەو بابەتە بەکارنەهێنێت.


#ئەمریکا
#عێراق