دەنگوباس:

سەرۆکایەتى شارەوانى سلێمانی ئەو هاوڵاتییانە ئاگادار دەکاتەوە کە زەوی زیادەڕۆکانەوە هەیە و تاپۆی ناکەن، دەڵێت: ئەوانەى زەوییەکانیان تاپۆ ناکەن بەبیانووی ئەوەی پارەیان زۆر ڵیوەردەگیرێت و بە سودمەندبوون حساب دەکرێن وانییە.
سەرۆکایەتى شارەوانى سلێمانى ڕوونکردنەوەیەکی بڵاوکردەوە و دەڵێت: تێگەیشتنێکی هەڵە هەیە بۆ تاپۆکردنی خانووە زیادەڕۆکان کە بەپێی یاسای (ژمارە 3 ساڵی 2019 هەموارکراو) ئەنجام دەدرێ بەوەی هەندێک لە فەرمانبەران ئامادەنین پارەی تاپۆکردنی خانووە زیادەڕۆکان بدەن بە شارەوانی گوایا بەهۆی ئەوەوە بە سوودمەند دادەنرێن و دواتر ناتوانن زەوی وەربگرن.
ئاماژەى بەوە کردوە، سوودمەندبوون بەهۆی ئەو یاسایەوە سنوورێکی زۆر تەسکی هەیە و تەنها لەم سێ دۆخەی خوارەوەدا بەهۆی تاپۆکردنی خانووی زیادەڕۆوە بە سوودمەند دادەنرێت
١- ئەگەر خانووەکە بەبێ بەرامبەر تاپۆ بکرێت.
٢-ئەگەر خانووەکە پاش جیاکردنەوەی زەوییەکە دروستکرابێت، واتە ئەگەر خانووەکە بە رێژەی 25%ی بەهای زەوییەکە تاپۆ بکرێت.
٣-ئەگەر رووبەری تاپۆکراو لە 200 مەتری چوارگۆشە زیاتر بێ، بەڵام خانووەکانی سنووری تاسڵوجە و عەربەت هەتا 300 مەتریش بە سوودمەند دانانرێن.