دەنگوباس:

ئەمشەو جارێکی دیکە شەڕێکی قورس لەنێوان گەریلاکانى پەکەکە و سوپای تورکیا لە سنووری ئامێدی دەستی پێکردەوە.
بە درێژایی ئەمڕۆ شەڕی قورس لەنێوان گەریلاکانى پەکەکە و سوپای تورکیا لە سنووری ئامێدی و ئاکرێ بەڕێوەچوو، فڕۆکە بەردەوام بەسەر ئاسمانی ناوچەکەدا سوڕاوەتەوە.
بەپێی ئەو گرتە ڤیدیۆیانەى ئەمشەو بڵاوکراونەتەوە، لە سنووری ناحیەی دێرەلوکی سەر بە قەزای ئامێدی جارێکی دیکە شەڕ لەنێوان هەردوولادا دەستی پێکردووەتەوە و تا ئامادەکردنى ئەم هەواڵە شەڕ بەردەوامە.
ڕۆژانە بە بەردەوامی تورکیا بۆردوومانى سنوورەکانى هەرێمی کوردستان دەکات بە بیانووی بوونى بنکە و بارەگاکانى پەکەکە، زۆرجاریش شەڕ لەنێوانیان بۆ ماوەى چەندین کاتژمێر ڕوو دەدات.
مانگی ئازاری ئەمساڵ ڕەجەب تەیب ئەردۆغان سەرۆک کۆماری تورکیا ڕاگەیاند، لە هاوینى ئەمساڵ ئۆپەراسیۆنێکی دیکە لە هەرێمی کوردستان دژ بە پەکەکە دەست پێدەکەن، پەکەکەش ئامادەیی خۆی بۆ وەڵامدانەوەى هەر هێرش و ئۆپەراسیۆنێکی تورکیا ڕاگەیاند.