دەنگوباس

نرخی کارەبای موەلیدە ئەهلییەکان لە سلێمانی بۆ مانگی ئایار دیاریکرا، نرخی ئەمپێرێک لە سلێمانی لەنێوان شەش هەزار و 750 بۆ هەشت هەزار دەبێت.

عوسمان محەمەد، سەرۆکی کۆمەڵەی موەلیدە ئەهلییەکان لە سلێمانی ڕایگەیاند، ڕۆژانە لەناو گەڕەکەکانی شاری سلێمانی، شەش کاتژمێر کارەبای موەلیدە دەدرێت بە هاووڵاتییان و تاوەکو کۆتایی ئەم مانگە 170 بۆ 180 کاتژمێر کارەبایان پێدەدرێت، هەندێک گەڕەکیش 180 بۆ 190 کاتژمێر کارەبای موەلیدەیان پێدەدرێت.

ئاماژەی بەوەکرد، بۆ ئەم مانگە بەگوێرەی نرخی سووتەمەنی، بۆ هەر کاتژمێرێک کارەبای موەلیدە 40 دینار دیاریکراوە و لەو گەڕەکانەی رۆژانە شەش کاتژمێر کارەبای موەلیدەیان پێدراوە، شەش هەزار و 750 دینار بۆ حەوت هەزار 250 دینار بۆ یەک ئەمپێر وەردەگیرێت، ئەو گەڕەکانەش کە کارەبای زیاتریان پێدراوە حەوت هەزار و 500 دینار بۆ هەشت هەزار دینار وەردەگیرێت.