دەنگوباس
فەرماندەیی هێزەكانی كۆماندۆی كوردستان لە ڕاگەیەندراوێکدا
بڵاویکردەوە، لە ئۆپەراسیۆنێكدا دوو تونێلی داعش خاپوور كرا و دەست بەسەر ژمارەیەك
كەرەستەی ئەلیكترۆنی تیرۆریستاندا گیرا.
ئاماژەی بەوەکرد، تیمێكی شەڕكەر لە "كوڕانی كۆماندۆ" دوای
دەستكەوتنی زانیاری وردی هەواڵگری لەگەڵ تیمێكی هاوپەیمانان لە کاتژمێر 2ی شەوی
پێنجشەممە لەسەر هەینی لە سنووری گەرمیان - تاوێركەوە،
دەستیان بە كێوماڵ كردنی "دەرچەی تاوێركەوە" كرد و دوو تونێلی تیرۆریستانیان
لەو ناوچەیە خاپوور كرد.
ئەوەشی خستەڕوو، لەكاتی كێوماڵ كردنەكەدا و لە یەكێك لە تونێلەكان
"كوڕانی كۆماندۆ" دەستیان بەسەر چەند ئامێرێكی ئەلیكترۆنی و لاپتۆپ و
پارچەی یەدەكی ئامێرە ئەلیكترۆنییەكاندا گرت، كە ئامانجی ئۆپراسیۆنەكە دەستكەوتنی
ئەو كەرەستانە بوو.
ڕاشیگەیاند، ئۆپەراسیۆنەكە لە ئاسمانەوە لە لایەن هێلیكۆپتەری
هاوپەیمانانەوە پاڵپشتی كرا و لە کاتژمێر 9ی بەیانی ئەمڕۆ هەینی كۆتایی هات.
#باشووری کوردستان