دەنگوباس

دادگای فیدراڵی عێراق لە وەڵامی دەستەی دادوەری هەڵبژاردنەكان ڕایگەیاند، ڕۆژی یەكشەممە، لەسەر سكاڵاكەی مەسرور بارزانی سەرۆك وەزیرانی هەرێم كۆدەبێتەوە و ئەو سكاڵایە لە چوارچێوەی پسپۆِری ئەواندایە، بەپێی ماددەی 93ی دەستوور.

دادگای فیدڕاڵی عێراق بڵاویكردەوە، لە سكاڵاكەی مەسرور بارزانیدا داواكراوە ماددەی دوو لە سیستمی تۆماركردنی لیستی كاندیدەكان و پەسەندكردنیان بۆ هەڵبژاردنی پەرلەمانی كوردستان بە نادەستووری دابنرێت.

ڕاشیگەیاند، وەرگرتنی ئەو سكاڵایە لە چوارچێوەی پسپۆڕی ئەواندایە، ئەوەش بە گوێرەی ماددەی 93/یەكەمی دەستوور بۆ ساڵی 2005.

لەسەر داواكەی مەسرور بارزانی، ڕۆژی حەوتی ئەم مانگە، بڕیاری وەلائی بۆ ڕاگرتنی كارەكانی كۆمسیۆنی هەڵبژاردن دەركرا و جێبەجێكردنی بەندی دووەمی ماددەی دووی سیستمی تۆماركردنی لیستی كاندیدەكان و پەسەندكردنیان لەلایەن كۆمسیۆنەوە ڕاگرت.

بەپێی ئەو بەندە، پەرلەمانی كوردستان لە 100 كورسی پێكهاتووە، كە 34ی بۆ هەولێر و 38 بۆ سلێمانی و 25 بۆ دهۆك و سێ كورسی بۆ هەڵەبجەن.