دەنگوباس

وەزارەتی شارەوانی و گەشتوگوزار ڕایگەیاند، ڕێکارەکانی دابەشکردنی زەوی بەسەر فەرمانبەران دەستیپێکردووە و ئاماژەی بەوەشکرد، زەوی بەو خانەنشینانەش دەدرێت، پێشتر زەوییان وەرنەگرتووە.

موفیدە یونس، راوێژکاریی یاسایی لە وەزارەتی شارەوانی و گەشتوگوزاری حکومەتی هەرێمی کوردستان ڕایگەیاند، لەلایەن وەزارەتی شارەوانی و گەشتوگوزارەوە، ڕێنمایی تایبەت بە دابەشکردنی زەویی بەسەر فەرمانبەراندا ئامادەکردووە و ڕێنماییەکان لەلایەن وەزیرەوە ئیمزا کراوە.

ئاماژەی بەوەشکرد، هەموو ئەو فەرمانبەرانەی پێشتر سوودمەند نەبوون لە وەرگرتنی زەوی و خزمەتییان لە هەشت ساڵ کەمتر نییە، بەگوێرەی ڕێنماییەکان زەوییان پێ دەدرێت.

موفیدە یونس وتیشی، دابەشکردنی زەوی، خانەنشینانیش دەگرێتەوە، کە پێشتر لە ژیانی فەرمانبەریدا، لە وەرگرتنی زەوی سوودمەند نەبوون.

سەبارەت بە مەرجەکانی دابەشکردنی زەوی، موفیدە یونس ڕایگەیاند، دابەشکردنی زەوی بەگوێرەى خاڵبەندی دەبێت، کە ڕەچاوی ساڵانی خزمەت،

ژمارەی ئەندامانی خێزان و شوێنی لەدایکبوون دەکرێت، بەگوێرەى خاڵبەندی، فەرمانبەران دەچنە کێبڕکێوە و زەوییان پێدەدرێت.

ئەمەش لە کاتێکدایە، ڕۆژی 27ی ئازار ئەنجومەنی وەزیران بڕیاریدا زەوی بەو فەرمانبەرانە بدرێت، کە تا ئێستا سوودمەندنەبوون.