لەشکر حەمەساڵح
سەرهەڵدانەوەی سەرلەنوێی كێشەی گوندی پەلكانە و گوند و ناوچەی تری هاوشێوە، دروست لە سەرەتای هەموو وەرزێكی دروێنە و دوورینەوەی بەروبومی جوتیاراندا، دەرگا لە بەردەم گومان و پرسیارەكاندا واڵا دەكات كە بۆچی جارێكی تر رووداوی لەو جۆرە لە هەمان ناوچەدا سەرهەڵدەداتەوە و بۆچی چارەسەرێكی بنچینەیی بۆ نادۆزرێتەوە؟
لە راستیدا، كێشەی گوندی پەلكانە، بەرلەوەی كێشەی گوندێك یان ناوچەیەكی دیاریكراو بێت، كێشەی ناوچەیەكی فراوانە كە ئەمڕۆ ناوچەیەكی دابڕێنراوی كوردستانە و لە رووی ئیداریشەوە دەكەوێتە دەرەوەی ئیدارەی هەرێمی كوردستانەوە، لە رووی یاساییشەوە بەشێكە لەو ناوچانەی دەكەوێتە سنووری مادەی 140ی دەستووری عیراقەوە. بەڵام بۆچی ئەم كێشەیە لە پەلكانە سەرهەڵدەدات و زەق دەبێتەوە بەڵام لە ناوچەی تر و گوندی تر دۆخەكە بەو جۆرە نییە؟! ئایا ئەمە مەبەستێكی سیاسی لە پشتەوەیە یان تەنها رێكەوت رۆڵ دەگێڕێت و هیچ كەس و لایەنێك كاری بەوە نییە گرژی و ئاڵۆزی لەو ناوچەیەدا دروست بكات؟ یاخود پرسیارەكە بە جۆرێكی تر؛ هۆكار و پاڵنەرە بابەتییەكان كامانەن كە زەمینە خۆش دەكەن بۆ ئەوەی ناكۆكی و گرژی لە پەلكانە بەو جۆرە سەرهەڵبدات و بگاتە گرتنەوەی ئاوی خواردنەوە لەسەر دانیشتوانە رەسەنەكەی؟
ئەمانە كۆمەڵێك پرسیارن كە دەشێت دەیان و سەدان پرسیاری تری هاوشێوەی بۆ بەراوردكردن و گومانكردن لێ دروست بكرێت، بەڵام بۆ ئەوەی لە بابەتەكە دوور نەكەوینەوە پێویستە وردتر دیقەت بدەین و باری سەرنجێكی بابەتی بخەینەڕوو و بەدوای چارەسەرێكی گونجاودا بگەڕێین.
كێشەی گوندی پەلكانە، بەرلەوەی كێشەی گوندێك یان ناوچەیەكی دیاریكراو بێت، كێشەی ناوچەیەكی فراوانە كە ئەمڕۆ ناوچەیەكی دابڕێنراوی كوردستانە و لە رووی ئیداریشەوە دەكەوێتە دەرەوەی ئیدارەی هەرێمی كوردستانەوە
بێگومان ئەو چارەسەرەش هیچی تر نییە جگە لە گەڕانەوە بۆ دەستوور و یاسا و دوورخستنەوەی دۆسێی ئەو گوندە و گوند و ناوچەی تری هاوشێوە لە بەكارهێنانی بۆ ئەجێندای سیاسی و وروژاندنی هەستی نەتەوەیی كە سەرەتا و ناوەڕاست و كۆتاییەكەی لە بەرژەوەندی و سوودی ئەو گوندە و گوند و ناوچە هاوشێوەكاندا نییە. بەڵام ئەوەی كە وا دەكات پەلكانە ببێتە سەرزەمینێك بۆ مانۆڕی سیاسی و بەكارهێنانی بۆ ئەجێندای جیاجیا و تەنانەت زەمینەسازیش بۆ قووڵبوونەوە و درێژەكێشانی ئەو بارودۆخە، مانەوەی دۆخەكەیە وەك خۆی بەبێ هەوڵدان بۆ چارەسەرێكی بنچینەیی بە رەچاوكردنی یاسا و دەستوور و هۆشیاركردنەوەی خەڵك بەرامبەر ئەگەری بەكارهێنانیان بۆ مەبەست و ئەجێندای دیاریكراو. بۆیە ئەولەویەت ناچاركردنی حكومەت و لایەنی تایبەتمەند و پەیوەندیدارە بە گرتنەبەری رێوشوێنی پێویست بۆ چارەسەركردنی گرفتەكان و رێگرتن لە قووڵبوونەوە و پەرەسەندنی.