دەنگوباس

پارێزگای هەولێر ڕایگەیاند، لە کۆی زیاتر لە ٤ ھەزار دوکان، ٢٢٧ دوکان و ٧ کۆگای بچووکی بازاڕەکە سووتان و زیانیان پێگەیشتووە، ئەمڕۆش دوای خەمڵاندنی زەر و زیانەکان دەست بە پاککردنەوەی تەواوی بازاڕەکە کراوە.

پارێزگای ھەولێر ڕاگەیاندراوێکی لەبارەی ئاگرەکەی بازاڕی قەیسەریی ھەولێر بڵاوکردەوە و تیاییدا خەمڵاندنی دواین داتا و ئاماری خستووەتەڕوو کە بەھۆی ئاگرەکەوە ٢٢٧ دوکان، ٧ کۆگا سووتاون و ١٣٢ کەسیش لە ڕووداوەکە بریندار بوونە.

پارێزگای ھەولێر لە ڕاگەیاندراوەکەدا بڵاویکردووەتەوە کە دوای ڕووداوی ئاگرەکەوتنەوەکەی شەوی ڕابردووی بازاڕی قەیسەریی ھەولێر و کۆنتڕۆڵکردنی لەلایەن تیمەکانی بەرگری شارستانی، لیژنەیەکی تایبەت بە خەمڵاندنی زیانەکان پێکھات.

لە ڕاگەیاندراوەکە ئاماژە بەوەکراوە، کە بە خەمڵاندنی زیانەکان، دواین ئامار لە کۆی زیاتر لە ٤ ھەزار دوکان، ٢٢٧ دوکان و ٧ کۆگای بچووکی بازاڕەکە سووتان و زیانیان پێگەیشتووە، ئەمڕۆش دوای خەمڵاندنی زەر و زیانەکان دەست بە پاککردنەوەی تەواوی بازاڕەکە کراوە.

ئەوەشخراوەتەڕوو، کە لەم ڕووداوەدا جگە لە زیانی ماددی، ھیچ زیانێکی گیانی لێنەکەوتووەتەوە، بەڵام بەداخەوە بە ھۆی قەرەباڵغییەکی زۆری ھاوڵاتییان لە شوێنی ڕووداوەکە، ١٣٢ کەس لە ئەفسەر، کارمەندانی بەرگری شارستانی، ئاسایش، پۆلیس، کاسبکار و ھاوڵاتی، بریندار بوون و بەشێکیشیان بە ھۆی دووکەڵی ئاگرەکەوە تەندروستیان تێکچوو، ھەر زوو لە لایەن تیمەکانی تەندروستی لە شوێنی ڕووداوەکە ١١٧ کەسیان چارەسەرکران و ١٥ کەسی دیکەشیان کە پێویست بوون گواسترانەوە بۆ نەخۆشخانەی فریاکەوتن و چارەسەری پێویستیان بۆ کرا.

پارێزگای ھەولێر جەختی لەوەشکردووەتەوە کە ھاوڵاتییانی شاری ھەولێر دڵنیا دەکەنەوە کە لیژنەیەک بۆ لێکۆڵینەوە و بەدواداچوون لە ھۆکاری کەوتنەوەی ئاگرەکە و خەمڵاندنی قەبارەی زیانە ماددییەکان پێکھێنراوە و لەو نزیکانە دەرەنجامەکانی ئاشکرا دەکرێت.

شەوی ڕابردوو ئاگر لە بازاڕی قەیسەریی ھەولێر کەوتەوە و کۆنتڕۆڵکردنی ئاگرەکە ماوەی چەند کاتژمێرێکی خایاند و وێڕای کۆنتڕۆڵکردنی ئاگرەکە، تا بەرەبەیانی ئەمڕۆش دووکەڵ لەسەر بازاڕەکە دەبینرا.