دەنگوباس

حزبوڵڵای لوبنان ڕایگەیاند، لە وەڵامی ھێرشی سوپای ئیسرائیل بۆسەر شارۆچکەی میس جەبەل باشووری لوبنان کە بەھۆیەوە ژمارەیەک کەسی مەدەنی کوژران و برینداربوون، ھێرشی مووشەکیان کردووەتە سەر جوولەکەنشینی کیریات شمۆنا لە باکووری ئیسرائیل.

حزبوڵڵای لوبنان لە ڕاگەیاندراوێکدا ئاماژەی بەوەداوە کە چەکدارەکان، بە ئاڕاستەکردنی دەیان مووشەکی کاتیۆشا و فەیلەق، جوولەکەنشینی کیریات شمۆنا-یان لە باکووری ئیسرائیل کردووەتە ئامانج.

باسی لەوەشکردووە، ئەو ھێرشەیان لە وەڵامی ئەو ھێرشەی سوپای ئیسرائیل بۆسەر شارۆچکەی میس جەبەل باشووری لوبنان کە بەھۆیەوە ژمارەیەک کەسی مەدەنی کوژران و برینداربوون، ئەنجامداوە.

پێشتر ئاژانسی ھەواڵی فەرمی لوبنان بڵاوی کردبووەوە کە فڕۆکە جەنگییەکانی ئیسرائیل، ھێرشیان کردووەتە سەر شارۆچکەی میس جەبەل باشووری لوبنان و لە ئاکامدا، سێ کەسی مەدەنی کوژراون و ژمارەیەکی دیکەش برینداربوون.