دەنگوباس

دەزگای ئاسایشی هەرێمی کوردستان دەستگیرکردنی گەورە بازرگانێکی نێودەوڵەتی ماددەی هۆشبەری ڕاگەیاند.

دەزگای ئاسایشی هەرێم لە ڕاگەیەندراوێکدا بڵاویکردەوە، بەڕێوەبەرایەتی گشتی ئۆپراسیۆنەکانی ئاسایش، بەهەماهەنگی بەڕێوەبەرایەتی نەهێشتنی ماددە هۆشبەرەکان و دەزگای ئاسایشی نیشتمانی عیراق، دوای وەرگرتنی فەرمانی دادوەر و کۆکردنەوەی زانیاری هەواڵگری وورد لەسەر بوونی بازرگانێکی ماددەی هۆشبەر لە سنووری ئیدارەی ڕاپەڕین، لە ٢٠٢٤/٥/٤ توانرا تۆمەتبار (ئ، م، ح) دەستگیربکرێت، لە کاتی دەستگیرکردنیدا دەستبەسەر بڕی سێ کیلۆ گرام و نیو ماددەی هۆشبەر و چەندین پارچە چەکی تۆمەتباردا گیرا.

ئاماژەی بەوەشکرد، ئەم بازرگانە لە سنوورەکانی نێوان وڵاتانی عێراق و سوریا کاری بازرگانی ماددەی هۆشبەری کردووە و لە هەفتەی ڕابردوودا پاش ئەوەی بڕێکی زۆر ماددەی هۆشبەر دەنێرێت بۆ شاری بەغدا دەستیبەسەردا دەگیرێت.

ئەوەشی خستەڕوو، تۆمەتبار لە ڕابردوودا چەندین جار لەهەوڵی دەستگیرکردنیدا بە چەک ڕووبەڕووی هێزە ئەمنییەکان بووەتەوە و هەڵهاتووە، ئێستا بە بڕیاری دادوەری لێکۆڵینەوەی ئاسایش بە ماددەی ٢٥ لە یاسای بەرەنگاربوونەوەی ماددە هۆشبەرەکان دەستگیرکراوە لێکۆڵینەوە لە کەیسەکەی بەردەوامە.