دەنگوباس

فراکسیۆنی پارتی دیموکراتی کوردستان لە پەرلەمانی عێراق لەبارەی هەڵبژاردنی پەرلەمانی کوردستانەوە ڕاگەیەندراوێکی بڵاوکردەوە، لە وەڵامی ڕاگەیەندراوێکی فراکسیۆنەکانى یەکێتی، یەکگرتوو، کۆمەڵ و نەوەی نوێ لە پەرلەمانى عێراق لە دژی هەوڵەکانی دواخستنی هەڵبژاردنی پەرلەمانی کوردستان.

فراکسیۆنەکانى یەکێتی، یەکگرتوو، کۆمەڵ و نەوەی نوێ لە ڕاگەیەندراوێکی هاوبەشدا بە توندى هەموو هەوڵێکیان بۆ دواخستنى هەڵبژاردن ڕەتکردەوە، ئاماژەیان بەوەکرد، سێجار لەسەر خواستى پارتێکى سیاسی و وەک تەحەدایەکى تەواوەتى یاسا و دەستوور و مەرسوومەکانى سەرۆکى هەرێمى کوردستان و بڕیارەکانى دادگاى فیدراڵى و بڕیارەکانى کۆمیسیۆنى هەڵبژاردنەکان، وادەى هەڵبژاردنى پەرلەمانى کوردستان دواخراوە.

دەقی ڕاگەیەندراوەکە:
بە سەرسوڕمانێکی زۆرەوە بەیاننامەیەک لەلایەن چەند فراکسیونێک لە پەرلەمانی عێراقەوە دەرچووە سەبارەت بە هەڵبژاردنی پەرلەمانی کوردستان، ئێمە لە پارتی دیموکراتی کوردستان جەخت لەسەر ئەم خاڵانەی خوارەوە دەکەینەوە :

١- پارتی دیموکراتی کوردستان یەکەم هێزی سیاسی کوردستان بوو لە ڕێگای جەنابی مەسعود بارزانی و لە بەهاری ساڵی ١٩٩١ لە گردبوونەوەیەکی جەماوەری باسی لەوەکرد کە دەبێت شەرعییەتی شۆڕشگێری بگوازینەوە بۆ شەرعییەتی دەستووری و دیموکراسی لە ڕێگای هەڵبژاردنەوە .

٢- لە ساڵی ١٩٩٢ تا دواین هەڵبژاردن، پارتی دیموکراتی کوردستان براوەی یەکەم بووە و هیچ کات ترسی هەڵبژاردنی نەبووە، چونکە پشت ئەستورە بە ئەندام و لایەنگران و دۆستانی پارتیمان و نیشتیمانپەروەرانی کوردستان.

٣- پارتی ماوەی دوو ساڵە داوا دەکات هەڵبژاردن بکرێت، بەڵام هەندێک لایەن و بەتایبەت ئەوانەی ئیستا بەیاننامە دەنووسن خۆیان باش دەزانن کام لایەن بوو ڕێگربوو لە ئەنجامدانی هەڵبژاردن و ئەوەش دەزانن کە کام لایەنی سیاسی بوو دەیگووت ئەگەر هەڵبژاردنیش بکرێت ناهێڵین سندوقەکانی دەنگدان لە دێگەڵە بەولاوە دابنرێت و ناهێڵین لە سنوری سلێمانی هەلبژاردن بکرێت.

٤- پارتی دیموکراتی کوردستان هەمیشە لەگەڵ هەڵبژاردن بووە و لەگەڵیشی دەبێت بە مەرجێک ئیرادەی خەڵکی کوردستان پارێزراو بێت و دوور بێت لە داڕشتنی پێش وەختە و ئەو تێبینی و سەرنجانەی پارتی تێبینی نەتەوەیەکن و پارتی لەگەڵ هەڵبژاردنێکی شەفاف و دوور لەدەست وەردانە.

٥- پارتی دیموکراتی کوردستان لەگەڵ ئەوەیە هەڵبژاردنێک بکرێت مافی سەرجەم پێکهاتەکان پارێزراو بێت و ناکرێت پێکهاتەکان لە تورکمان، کلد و ئاشوری لە پەرلەمانی عێراق نوێنەریان هەبێت و لە پەرلەمانی کوردستان بێبەش بکرێن .

لەکۆتاییدا داوا دەکەین هەڵبژاردنێکی پاک و شەفاف ئەنجام بدرێت و سەرجەم پێکهاتەکان تێیدا بەشداربن، داواش دەکەین تیمی یونامی و کۆمەڵگای نێودەوڵەتی و چاودێرانی نێودەوڵەتی چاکتر و فراوانتر چاودێری پڕۆسەکە بکەن و پارتی جەخت لەوە دەکاتەوە، زەمینەسازی بکرێت بۆ ئەنجامدانی هەڵبژاردنێکی شەفاف و تەواوی لایەنە سیاسییەکان و پێکهاتەکانی کوردستان بەشداری تێدا بکەن و دووربێت لە سەپاندنی ئیرادە و ئەنجام و دابەش کاری پێش وەخت .