دەنگوباس
ئه‌ندامێكی خولی پێشووی په‌رله‌مانی عێراق ڕایگەیاند، سودانی به دوای ده‌رچه‌یه‌كدا بۆ كێشه‌ی به‌بانكیكردنی مووچه ده‌گه‌ڕێت، به‌ڵام ده‌رچه‌كه ئه‌وه نییه كه پارتی و حكومه‌تی هه‌رێم ده‌یانه‌وێت.
ئه‌حمه‌د حاجی ڕه‌شید، ئه‌ندامی لیژنه‌ی دارایی خولی پێشووی په‌رله‌مانی عێراق، بۆ میدیای حزبەکەی سه‌باره‌ت به هه‌واڵی ڕاستكردنه‌وه‌ی بڕیاری به‌بانكیركردنی مووچه له‌لایه‌ن دادگای فیدڕاڵییه‌وه، ڕایگه‌یاند دادگا هیچ گۆڕانكارییه‌ك له بڕیاره‌كه‌یدا ناكات، مووچه ته‌نیا له ڕێگه‌ی بانكه حكومییه‌كانی (ڕه‌شید، ڕافیده‌ین و تی بی ئای)ه‌وه ده‌درێت، تاكه گۆڕانكاری كه ئه‌گه‌ری هه‌بێت بكرێت، ئه‌وه‌یه كه بانكه‌كانی ناو “هه‌ژماری من” سوود له‌و بانكه حكومییانه وه‌ربگرن بۆ به‌شداری له دابه‌شكردنی مووچه.
ئەمە لە کاتێکدایە، تا ئێستا پڕۆسەی بە بانکیکردنی مووچەی فەرمانبەرانی هەرێم لەنێوان حکومەتی عێراق و هەرێم یەکلا نەبووەتەوە، بەپێی بڕیاری دادگای فیدڕاڵی عێراق لە ٢١ی شوبات پڕۆسەی بە بانکیکردنی مووچە دەبێت لە ڕێگەی بانکە فیدڕاڵییەکانی عێراقەوە بێت، تا ئێستاش حکومەتی هەرێم جەخت لەوە دەکاتەوە کە پڕۆسەی بە بانکیکردنی مووچە دەبێت لە ڕێگەی پڕۆژەی "هەژماری من" ەوە بێت.
#باشووری_کوردستان