کوردستان

وتەبێژی وەزارەتی کارەبا: لە کەمتر لە 24 کاتژمێر بارودۆخی کارەبا ئاسایی دەبێتەوە

28/04/2024
karaba

دەنگوباس

پاش ئەوەی شەوی هەینی بە  درۆن هێرشکرایە سەر کێڵگەی غازی کۆرمۆر لە چەمچەماڵ، بووە هۆی کەمبوونەوەی بەرهەمهێنانی کارەبا، لەوبارەیەوە وتەبێژی وەزارەتی کارەبای هەرێم ڕایگەیاند، "لە کەمتر لە 24 کاتژمێر بارودۆخی کارەبا ئاسایی دەبێتەوە".

ئەمڕۆ یەکشەممە، ئومێد ئەحمەد، وتەبێژی وەزارەتی کارەبای هەرێم ڕایگەیاند، هەوڵەکان چڕکراونەتەوە بۆ ئەوەی لە ڕووی تەکنیکییەوە هەناردەی گاز لە کێڵگەی کۆمۆڕ ئاسایی بکرێتەوە.

ئاماژەی بەوەکرد، ئەگەر هەناردەی گاز بۆ وێستگەکانی کارەبا دەست پێ بکاتەوە، وەزارەتی کارەبا لە کەمتر لە 24 کاتژمێر بارودۆخی کارەبا ئاسایی دەکاتەوە.

ئەوەشی خستەڕوو، بە هەوڵ و ڕێنمایی و پاڵپشتیی وەزیری کارەبا توانرا لەکاتی هێرشە درۆنییەکە سیستەمی کارەبا لە کوژانەوەی گشتی بپارێزرێت، وێستگە و محاویلەکانی کارەبا لە سوتان و تێکچوون بپارێزرێت.

ئەمەش لە کاتێکدایە، شەوی هەینی، بە دوو درۆن هێرشکرایە سەر کێڵگەی غازی کۆرمۆر لە چەمچەماڵ، بە هۆیەوە چوار کرێکار گیانیان لەدەستدا و سیانی دیکەش برینداربوون کە سەرجەمیان بیانین، زیانێکی ماددی زۆریش بە کێڵگەکە گەیشت و بووە هۆی کەمبوونەوەی بەرهەمهێنانی کارەبای هەرێم، بە بڕی دوو هەزار و 500 مێگاوات.

کێڵگەی کۆرمۆر کە لە ساڵی 2007 ەوە لە سنووری شاردێی قادر کەرەم دامەزراوە و کۆمپانیای دانەغاز بەرهەمهێنانی تێدا دەکات، بە پێدانی غاز بە وێستگەکانی کارەبای چەمچەماڵ و هەولێر 67%ی کارەبای هەرێمی کوردستان دابین دەکات.



#باشووری_کوردستان