دەنگوباس

یەكێتی مامۆستایانی كوردستان لە ڕاگەیەندراوێکدا بڵاویکردەوە، ڕەتکردنەوەی پڕۆژەی "هەژماری من" لەلایەن یەکێتی مامۆستایانەوە دوورە لە ڕاستییەوە.

ئەمڕۆ شەممە، یەكێتی مامۆستایانی كوردستان سەبارەت بە پڕۆژەی "هەژماری من"، كە تایبەتە بە بانكی كردنی مووچەی مووچەخۆرانی هەرێمی كوردستان لەلایەن حكومەتی هەرێمەوە لە ڕێگەی بانكە ئەهلییەكانەوە ڕوونكردنەوەیەكی بڵاوکردەوە و ڕایگەیاند، "هەر ئەندامێکی یەکێتی مامۆستایان لێدوان بدات، گوزارشتە لە ڕای کەسی خۆی".

لە ڕووونكردنەوەكەدا ئاماژەی بەوەكرد، هەندێك لێدوان بڵاوكراوەتەوە كە گوایە یەكێتی مامۆستایان "هەژماری من" ڕەتدەكاتەوە، كە ئەمەش دوورە لە ڕاستی، چونكە یەكێتی مامۆستایان لە چەندین پارت و لایەن پێكهاتووە هەریەكە و گوزارش لە بۆچوونی خۆی دەكات.
جەختیشی لەوە کردەوە، هەر ئەندامێك لە یەكێتی مامۆستایان ئەگەر لێدوانێك یان كۆمێنێتك بكات، گوزارشت لە ڕای یەكێتی مامۆستایان ناكات.

دەقی ڕوونكردنەوەكەی یەكێتی مامۆستایانی كوردستان:
یەكێتی مامۆستایانی كوردستان ئەو دەنگۆیانە رەت دەكاتەوە كە هەندێ پەیج و ماڵپەر بەناوی یەكێتی مامۆستایان بڵاویان كردووەتەوە كە گوایە یەكێتیی مامۆستایان "هەژماری من" ڕەتدەكاتەوە.

بەداخەوە ماوەیەكە هەندێ پەیج و دەزگای میدیایی هەواڵ و زانیاری بە ناوی یەكێتی مامۆستایانی كوردستانەوە بڵاو دەكەنەوە، كە هیچ پەیوەندی بە یەكێتی مامۆستایانەوە نییە.

بەتایبەت هەندێك لێدوان بڵاوكراوەتەوە كە گوایە یەكێتی مامۆستایان "هەژماری من" ڕەتدەكاتەوە، ئەمەش دوورە لە ڕاستی، چونكە یەكێتی مامۆستایان لە چەندین پارت و لایەن پێكهاتووە هەریەكە و تەعبیر لە بۆچوونی خۆی دەكات، هەروەها هەر ئەندامێك لە یەكێتی مامۆستایان ئەگەر لێدوانێك یان كۆمێنێتك بكات، گوزارشت لە ڕای یەكێتی مامۆستایان ناكات.