دەنگوباس

ئەنجومەنی سەرتاسەریی مامۆستایان و فەرمانبەرانی ناڕازیی ڕاگەیەندراوێکیان بڵاوکردەوە، داوا دەکەن فەرمانبەرام فۆڕمی “هەژماری من” پڕ نەکەنەوە.

هاوکات مامۆستایان و فەرمانبەرانی ناڕازی جەخت لەوە دەکەنەوە، بەهۆی ئەو فشارانەی لەسەریان هەیە بۆ پڕکردنەوەی "هەژماری من" کە لە دادگای فیدڕاڵیی سکاڵا تۆماردەکەن و خۆپیشاندانی سەرتاسەری ڕادەگەیەنن.

دەقی ڕاگەیەندراوەکە:

 مامۆستایان و فەرمانبەران
هێزە ئەمنییەکانی کوردستان
خانەنشینان و خاوەنپێداویستی تایبەت
کەسوکاری شەهیدان و زیندانییانی سیاسی

زیاتر لە 10 ساڵە دەسەڵاتی ستەمکاری کوردیی، لە ڕێگەی گەمەی ئابووریی سەربەخۆ و داڵدەدانی ئاوارەکان و شەڕی داعش و ئەنجامدانی ڕیفراندۆم؛ دەستی خستووەتە بینەقاقای یەک بەیەکمان و بژێوی و خۆشگوزەرانیی و شکۆی گەلێکی کردووەتە بارمتەی دەوڵەمەندکردنی دوو بنەماڵە و قایمکردنی پێگە سیاسییە تاڵانکارەکانیان.

ئێستا و دوای بڕیارەکانی دادگای باڵای فیدراڵیی لە 21/ 2/ 2024، کە تروسکاییەک ئومێدمان بۆ گەڕایەوە و ئاهێک هاتەوە بە بەرمان، دەسەڵاتی پاوانخواز، وەک ئەوەی فۆبیای هەبێت بە خۆشگوزەرانیمان، لە ڕێی سەپاندنی بەزۆرەملێی “هەژماری من"، دەیەوێت دیسان کێشە بۆ مووچەکانمان دروستبکاتەوە، قووتی ئێمە بکاتەوە بە قوربانیی خۆسەپێنی خۆیان و بەرژەوەندیی بندیوارەکانیان.

لێرەوە سەرباری ئەوەی داوا لە مامۆستایان و فەرمانبەران و چین و توێژەکان دەکەین، ئەو فۆرمە شوومە ڕەتبکەنەوە و پڕینەکەنەوە؛ هاوکات ڕایدەگەیەنین، دەسەڵات بەزوویی دەست لەم خۆفەرزکردنە نایاساییەی هەڵنەگرێت؛ ئەوا: ڕوو دەکەینە دادگای فیدراڵیی و بەهۆی پابەندنەبوونی پارتی و یەکێتی بە بڕیارەکانییەوە، سکاڵایان لەسەر تۆماردەکەین، بەزوویی خۆپیشاندانی سەرتاسەریی لە شوێنی کاریگەر ڕادەگەیەنین، بەردەوام دەبین لە چالاکی مەدەنیی و دەستبەراری فشارەکان نابین، تا گەیشتن بە مافە ڕەواکانمان.

داوا لە حکومەتی عێراق و وەزارەتی دارایی حکومەتی ناوەند دەکەین؛ لەبارەی بە بانکیکردنی مووچەوە (توطین)، بەزوویی بەئەرکی خۆیان هەڵبستن، بۆئەوەی مووچەخۆرانی ڕاستەقینە باجی غرور و خۆپەرستی دەسەڵاتداران و مووچەخۆری بندیوار نەدەن.

لە کۆتاییشدا دووپاتی دەکەینەوە، ئەم فشارانەی یەکێتی بۆ پڕکردنەوەی “هەژماری من” دەیسەلمێنێت، ئەم حزبە یارییەکی دووڕووانەی قێزەون دەکات و هەرگیز ناتوانێت خۆی لە پاشکۆیەتی و ملکەچیی پارتی ڕزگار بکات، لەگەڵ دواخستنی هەڵبژاردندایە، کە بڕیاری دادگا و کۆمسیۆنە، بۆیە دڵنیای دەکەینەوە، دەست لەو فشارانە هەڵنەگرێت، ئەوا باجێکی قورس وەردەگرێت.