دەنگوباس

ئێوارەی ئەمڕۆ هەینی، لە ڕێگەی دوو درۆنەوە هێرشکرایە سەر کێڵگەی غازی کۆرمۆر لە چەمچەماڵ.

بەپێی زانیارییە سەرەتاییەکان، بەهۆی هێرشەکەوە دوو کەس گیانیان لە دەستداوە کە پاکستانین، دوو کەسی دیکەش بریندارن کە  کوردن، تا ئێستا دیار نییە لە کوێوە درۆنەکان ئاڕاستە کراون.

هاوکات لە دوای هێرشەکەی سەر کێڵگەی غازی کۆرمۆر، وەزارەتی کارەبا و سامانە سروشتییەکان ڕایانگەیاند، ئاگاداری هاوبەشانی كارەبا دەکەینەوە، بەهۆی هێرشێکی درۆنی بۆ سەر کێڵگەی کۆرمۆر، ناردنی گاز بۆ وێستگەكانی بەرهەمهێنانی کارەبا ڕاوەستاوە، بەهۆیەوە نزیکەی 2500 مێگاوات کارەبا کەم بووەتەوە.

ئاماژەیان بەوەشکرد، ستافی هەردوو وەزارەتی کارەبا و سامانە سروشتییەکان لەگەڵ لایەنە هاوبەشەکانیان لە هەوڵدان بۆ ئاساییکردنەوەی دۆخەکە و دووبارە دەستپێکردنەوەی گاز بۆ وێستگەکانی کارەبا.