دەنگوباس

وتەبێژی حکومەتی هەرێمی کوردستان ڕایگەیاند، پرۆژەی هەژماری من لە پرسی مووچەدا "ئەولەویاتی" حکومەتی هەرێمی کوردستانە و هەر چارەسەرێک لە نێوان هەولێر و بەغدا لەسەر حسابی پڕۆژەی “هەژماری من” ڕەتدەکەنەوە.

پێشەوا هەورامی، وتەبێژی حکومەتی هەرێمی کوردستان، بە دەنگی ئەمریکای ڕاگەیاند، هەژماری من یەکێکە لە ئەولەویاتەکانی حکومەتی هەرێم و بەلایەوە گرنگە، گەر “هەژماری من” قەبوڵ نەکرێت جۆرێکە لە بیانوو گرتن و گێچەڵ کردن، چونکە ئەوەی لەناو “هەژماری من’دا هەیە زۆر زیاترە لەوەی لە عێراق کراوە و پێیدەوترێت تەوتین (بە بانکیکردنی مووچە).

چاوەڕوان دەکرێت لەماوەی داهاتوودا شاندێکی حکومەتی هەرێمی کوردستان سەردانی بەغدا بکات بۆ گفتووگۆکردن لەگەڵ وەزارەتی دارایی عێراق.

چارەسەرکردنی کێشەی نێوان هەرێم و بەغدا لەسەر “هەژماری من” و پرسی بە ئەلیکترۆنی کردنی مووچەی مووچەخۆرانی هەرێم یەکێک دەبێت لەتەوەرەکانی گفتووگۆی نێوانیان.

پێشەوا هەورامی ڕایگەیاند، بە بانکیکردنی مووچە لە بانکە فیدڕاڵییەکانی عێراق (تەوتین) تەنها کارتێکی مووچە وەرگرتنە نەک هەژماری بانکی و بەشێک لەو بانکانەش نیشانەی پرسیاریان لەسەرە، بۆیە بەدوای چارەسەرێکدا دەگەڕێین و چارەسەرەکەش لەسەر حسابی دەستبەرداربوون نییە لە ”هەژماری من”، فەرمانبەری عێراق سەرپشک کراوە لە بانکی ئەهلی یان حکومی تەوتین بکات، بۆچی بۆ فەرمانبەری هەرێم بۆ ئەمە سنوردار کراوە؟"