دەنگوباس

بەڕێوەبەرى پۆلیسی گەرمیان نووسراوێکى ئاڕاستەى بەش و بنکەکانى پۆلیسی سنوورەکەى کردووە، جەختدەکاتەوە لەوەى هەموو ئەفسەر و کارمەندێک فۆڕمى “هەژمارى من” پڕبکاتەوە، هەر کەسێک پڕى نەکاتەوە مووچەکەى ڕادەگیرێت.

لە نووسراوێکدا، کە ئاراستەى سەرجەم بەش و بنکەکانى پۆلیسی سنوورى گەرمیان کراوە و ئیمزاى لوقمان سابر، بەڕێوەبەرى پۆلیسی گەرمیانى لەسەرە ئاماژە بەوەکراوە، هاوپێچ لەگەڵ نووسراوماندا فۆڕمى “هەژمارى من” دەنێرین بۆتان بە مەبەستى پڕکردنەوەى لەلایەن سەرجەم ئەفسەر و کارمەندانى بەشەکانتان و ناردنەوەى فۆڕمەکە بۆمان تا ڕۆژى یەکشەمە.

ئەوەش خراوەتەڕوو، لەکاتى پڕنەکردنەوەى فۆڕمەکەدا لەلایەن هەر ئەفسەر و کارمەندێکەوە، خۆى بەرپرسیارە دەبێت لە دواکەوتن و ڕاگرتنى مووچەکەى.

حکومەتی هەرێمی کوردستان لە مانگی ئابی ساڵی 2023 دەستیکرد بە پڕۆژەی "هەژماری من"، تاوەکو ئێستا 65 هەزار کەس ناویان لە پڕۆسەی (هەژماری من) تۆمارکراوە، بەپێی بڕیارەکەی دادگای فیدڕاڵی عێراق دەبێت پڕۆسەی بە بانکیکردنی مووچەی مووچەخۆران (تەوتین) لە ڕێگەی بانکە فیدڕاڵییە عێراقییەکانەوە بێت، هاوکات تا ئێستا حکومەتی هەرێم سوورە لەسەر ئەوەی کە پڕۆسەی بە بانکیکردنی مووچەی فەرمانبەران دەبێت لە ڕێگەی پڕۆسەی "هەژماری من"ەوە بێت.