دەنگوباس

وەزاەرتی کارو کاروباری کۆمەڵایەتی دەستپێکردنەوەی پڕۆسەی ناونووسکردنی کەسانی خاوەنپێداویستیی نوێ ڕادەگەیەنێت.

ئەمڕۆ پێنجشەممە، وەزارەتی کار و کاروباری کۆمەڵاتی لە ڕاگەیەندراوێکدا ئاماژە بەوەدەکات، دوای وەستانی زیاتر لە دە ساڵ لە پرۆسەی ناونووسکردنی نوێی کەمئەندامانی کوردستان، ناوی خاوەنپێداویستیی نوێ ئاڕاستەی وەزارەتی دارایی حکومەتی عێراق دەکرێت.

بەپێی ئەوەی لە ڕاگەیەندراوەکەدا هاتووە، کوێستان محەمەد، وەزیری کار و کاروباری کۆمەڵایەتی ڕەزامەندی وەرگرتووە، بۆ ئاڕاستەکردنی ناوی خاوەنپێداویستییە تایبەتەکان کە ساڵانێکە تۆمار کراون.

هەر لە ڕاگەیەندراوەکەدا هاتووە، ئاڕاستەکردنی ناوی ئەو خاوەنپێداویستییە تایبەتانە کە لە قۆناغی یەکەم زیاتر لە سیانزە هەزار کەس پشکنینیان بۆکراوە، بە مەبەستی دابینکردنی شایستەی کەمئەندامی، نووسراو ئاراستەی وەزارەتی دارایی حکومەتی عێراق دەکرێت، بەمەبەستی داواکردنی تەرخانی دارایی بۆ جێبەجێکردنی داوای وەزارەتی کار و کاروباری کۆمەڵایەتی.

شایەنی باسە زیاتر لە دە ساڵە پرۆسەی ناونووسین و تۆمارکردنی کەسانی نوێی خاوەنپێداویستی تایبەت لە هەرێم وەستاوە، دوای ڕێکەوتن لەگەڵ بەغدا وابڕیارە دەست بە ناونووس کردنەوە بکرێتەوە و ڕەوانەی بەغدا بکرێت.