دەنگوباس

بەڕێوەبەرایەتی نەهیشتنی ماددە هۆشبەرەکان وەڵامی سەرۆکی فراکسیۆنی یەکێتی دەداتەوە لەبارەی ئەو کەسەی لە ڕووبەڕووبوونەوەیەکدا لەگەڵ هێزەکانی ئاسایش کوژرا و ڕایگەیاند، تەواوی بەڵگەکان لەبەردەستی دادگادان و ئەو دۆسیەیە رێڕەوی یاسایی خۆی دەبڕێت.

ئەمڕۆ چوارشەممە، بەڕێوەبەرایەتی نەهیشتنی ماددە هۆشبەرەکانی ئاسایش لە میانەی راگەیاندراوێکدا بڵاویکردەوە، دوای ئەوەی بەهۆی ڕووبەڕووبوونەوەی دوو داواکراو لەگەل هێزەکانی ئاسایش لە کاتی جێبەجێکردنی فەرمانی دادوەر، یەکێکیان گیانی سپارد و ئەویتریان بریندار بوو، کەسوکاری ئەو داواکراوەی گیانی لە دەست داوە لێدوانیان هەبووە.

بەڕێوەبەرایەتی ماددەی هۆشبەرەکان جەخت لەوە دەکاتەوە، کە تەواوی بەڵگەکان لەبەردەستی دادگادان و ئەو دۆسیەیە رێڕەوی یاسایی خۆی دەبڕێت و نایانەوێت جگە لە بڕیار و ڕێنمایی دادگاکان هیچ ڕوونکردنەوەیەکی تر بدەن و وەڵامی ئەو لێدوانانەش تەنیا لە دادگا دەدەنەوە.

ئەمەش لە کاتێکدایە، ڕۆژی سێشەممە بەڕێوەبەرایەتیی نەهێشتنی ماددە هۆشبەرەکانی ئاسایش لە ڕوونکردنەوەکەیدا ئاماژەی بەوەکرد، کاتژمێر 6:15ـی ئێوارە، تیمێکی سەر بە بەڕێوەبەرایەتییەکەیان بۆ جێبەجێکردنی فەرمانی دادوەر بەدواداچوونی بۆ دوو بازرگانی ماددە هۆشبەرەکان لە دەوروبەری شاروچکەی عەنکاوە کرد.

لە ڕوونکردنەوەکەدا هاتووە، داواکراوەکان تەقەیان لە هێزەکانی ئاسایش کرد و لە ئاکامدا کارمەندێکی بەڕێوەبەرایەتیەکەیان بەسەختی بریندار کرد، هاوکات لە ئەنجامی وەڵامدانەوەی هێزەکانی ئاسایش، یەکێک لە داواکراوەکان کە بازرگانی ماددەی هۆشبەر بوو کوژرا و ئەوی دیکەیان دەستگیر کرا.

لەو بارەیەوە ئەمڕۆ هەرێم كەمال ئاغا، سەرۆكی فراكسیۆنی یەكێتی لە ئەنجومەنی نوێنەران، ڕوونکردنەوەیەکی لەبارەی دەنگۆی ڕووبەڕووبوونەوەی ئاسایش و کوژرانی بازرگانێکی ماددەی هۆشبەر بڵاوکردەوە و ڕایگەیاند، بۆ ڕای گشتی و هاووڵاتییان ڕوونی دەکەینەوە کە ڕووداوەكەی دوێنی ٤/٢٣ كەوا بڵاوكراوەتەوە دوو بازرگانی مادەی هۆشبەر ڕووبەڕووی ئاسایش بوونەتەوە لە ئەنجامدا یەكێكیان كوژراوە و ئەوەی تریان دەستگیر كراوە ،سەرلەبەری ئەم تۆمەتانە دوورن لە ڕاستی و جێگای گومانیشە، بۆیە لێرەدا چەند پرسیارێكی گرنگ دروست دەبێت دەمانەوێت وڵامەكەی بۆ خانەوادەكەیی و ڕای گشتی ڕوونبكرێتەوە .

ئاماژەی بەوەشکرد، لێرەدا بەشێوەیەكی گشتی جیا لە ئەنجامدانی ئەم تاوانە و ناوزڕاندنیان بەبازرگانی کردن بە ماددەی هۆشبەر تاوانێكی ترە، كە بەهیچ شێوەیەك ئەم كارە قێزەونە لە لای ئێمە ڕێگە پێدراو نییە.