دەنگوباس

لە ماوەی سێ مانگ و نیوی ئەم ساڵدا، زیاتر لە ملیۆنێک و 500 هەزار گەشتیار هاتوونەتە هەرێمی کوردستان.

 حکومەتی هەرێمی کوردستان ڕایگەیاند، بەپێی ئامارەکان لە سەرەتای ئەمساڵ تاوەکو ڕۆژێک دوای جەژن، ملیۆنێک و 700 هەزار گەشتیار هاتوونەتە هەرێمی کوردستان، تەنیا لە ڕۆژانی جەژندا و چەند ڕۆژێک پێشتر زیاتر لە 200 هەزار گەشتیار هاتوون.

ئیبراهیم عەبدولمەجید، بەڕێوەبەری ڕاگەیاندن و پەیوەندییەکانی دەستەی گەشتوگوزاری هەرێمی کوردستان ڕایگەیاند، ئەو ژمارەیە "دڵخۆشکەر"ە، بەو پێیەی سێ مانگی یەکەمی ساڵ "وەرزی زێڕین"ی گەشتیاری نییە.

وتیشی، ئەو ژمارەیە تەنیا گەشتیارانی بیانی دەگرێتەوە، نەک ئەو هاووڵاتییانەی کە بۆ گەشت ڕوویان لە سەیرانگای پارێزگاکانی دیکەی هەرێم کردووە.

بەڕێوەبەری راگەیاندن و پەیوەندییەکانی دەستەی گەشتوگوزاری هەرێمی کوردستان ڕایگەیاند، وەرزی زێڕینی گەشتیاری بە دیاریکراوی لە کۆتاییەکانی مانگی ئایارەوە دەستپێدەکات و ئەو کات ژمارەی گەشتیاران بە شێوەیەکی "دراماتیکی" زیاد دەکات، بەتایبەتی کە پشووی هاوین دەستپێدەکات. 

بە گوێرەی ئامارە فەرمییەکان، ساڵی ڕابردوو 7 ملیۆن و 279 هەزار گەشتیار سەردانی هەرێمی کوردستانیان کردووە.

ئیبراهیم عەبدولمەجید ئاماژەی بەوەشکرد، بە گوێرەی پلانی هەشت ساڵەیان، ئامانجیان زیادکردنی ژمارەی گەشتیارە و کار لەسەر بەرەوپێشبردنی کەرتی گەشتوگوزار دەکەن.