دەنگوباس

ئەمڕۆ لە تەلاری هونەر لە سلێمانی، مەراسیمی خەڵاتی زێڕینی بلە بەڕێوەچوو و ئەمساڵ 10 کەسایەتیی کورد، لە هەر چوار پارچەی کوردستان خەڵاتکران، کە ڕۆڵی گرنگیان لە بوارە جیاجیاکاندا هەبووە.

خەڵاتی زێڕینی بلە، خەڵاتێکی ساڵانەیە و هەموو ساڵێک لە ساڵیادی کۆچیدوایی، سیاسەتمەدار و نووسەر و شاعیری گەورەی کورد، ئیبراهیم ئەحمەد-دا، بەو کەسایەتییە کوردیانە دەبەخشرێت، کە لە بوارەکەیاندا ڕۆڵێکی گرنگ و دیارییان هەبووە.

ئەو کەسایەتییانەی کە خەڵاتەکەیان پێبەخشرا: عەلی بەدرخان، سینەماکاری کورد، حاجی فەهیمە محەممەد ئەمین، کەسوکاری ئەنفال، د جوان حەمی پزیشکی پسپۆڕی نەشتەرگەری و شکاوی، سەید عەلی ئەسغەری کوردستانی، گۆرانیبێژ و مەقامبێژی گەورەی کورد، د. شێرکۆ عەبدوڵڵا، تەنزنووس و وەرگێڕ و میدیاکاری ناسراوی کورد، خالید جاف، نووسەری کتێبی (لە زاری بەڵگەنامەوە)، ناسری رەزازی، پێشمەرگە، هونەرمەند و نووسەر، د. ئەختەر نەجمەدین شەمسەدین، مامۆستا عەلی ئەکبەر مورادی، ژەنیاری تەنبوور، ئیبراهیم ئەمین باڵدار، نووسەری کتێبی (ئەلف و بێی کوردی).