دەنگوباس

قائیمقامیەتی قەزای هەڵەبجە ڕایگەیاند، كە نابێت نرخی بوتڵێك غاز لە 8500 دینار زیاتر بێت و جەختیشدەكاتەوە، وەكیلەكان تابلۆی نوێ و لەزگەیان بە ڕەنگی سوور بۆ دەكرێت.

بەپێی ڕاگەیەندراوێکی قائیمقامیەتی قەزای هەڵەبجە، بە فەرمانی قائیمقام و بە ئامادەبوونی سەرپەرشتیار و سەرجەم ئەندامانی لیژنەی سووتەمەنی قائیمقامیەت لە بەرواری ( 23/4/2024 ) سەردانی کارگەی غازی هەورامان کرا و لە پاش پشکنینی تەواو، کارگەی ناوبراو هیچ گرفتێکی لە ڕووی کێشی بوتڵ و بەرگری شارستانی و پاکوخاوێنی و ژینگە و کامێرای چاودێری نەبوو.

ئەوەش خراوەتەڕوو، پێویستە لە ماوەی ۱٥ ڕۆژدا سەرجەم ڕێنماییەکانی کە ئاماژەیان پێدراوە جێبەجێ بکرێن، بە پێچەوانەوە ڕێکاری یاساییان بەرامبەر دەگیرێتەبەر.
ڕێنماییەکانیش بریتین لە:

1 - سەرجەم وەکیلەکان، تابلۆ و لەزگەی نۆییان بۆ بکرێت بە ڕەنگی سور.
2 - نابێت هیچ وەکیلێک غاز لە ٨٥۰۰ دینار زیاتر بفرۆشێت، کە نرخی فەرمی حکومەتە.
3 - مۆڵەتی کارگە نۆی بکرێتەوە.
4 - سەرجەم سەرەتاییەکانی وەکیلەکان ئاڕاستەی ب. ئاسایشی گشتی هەڵەبجە و ب. نەوت و کانزاکانی هەڵەبجە بکرێت.