دەنگوباس

ڕەجەب تەیب ئەردۆغان، سەرۆک کۆماری تورکیا ئەمڕۆ گەیشتە بەغدا، پاش کۆبوونەوەکانی لەگەڵ سەرۆک کۆمار و سەرۆک وەزیران، ئەمشەو گەیشتە هەولێری پایتەختی هەرێمی کوردستان.

ئەمڕۆ دووشەممە، پاش ئەوەی ڕەجەب تەیب ئەردۆغان، سەرۆک کۆماری تورکیا لەگەڵ سەرۆک کۆمار و سەرۆکوەزیرانی عێراق لە بەغدا کۆبووەوە، کەمێک لەمەوبەر، گەیشتە فڕۆکەخانەی هەولێر و لەلایەن شاندێکی باڵای حکومەتی هەرێمی کوردستانەوە پێشوازی لێدەکرێت.

بڕیارە ئەردۆغان لە سەردانەکەیدا بۆ هەولێر لەگەڵ هەریەک لە سەرۆکی هەرێمی کوردستان، مەسرور بارزانی، سەرۆکی حکومەتی هەرێمی کوردستان و شاندێکی باڵای حکومەت کۆببێتەوە.

ئەمەش لە کاتێکدایە، لە دوێنێوە ئامادەکارییان بۆ پێشوازیکردن لە ئەردۆغان دەستیان پێکردووە و بەشێک لە شەقامەکان ئاڵای هەرێم و عێراق و تورکیا هەڵکراوە، دوێنێ شەویش قەڵای هەولێر بە ئاڵای تورکیا ڕازێندرایەوە.