دەنگوباس

پۆلیسی سلێمانی ڕایگەیاند، مەفرەزەکانی نوسینگەی نەهێشتنی تاوانی ناوبازاڕ تۆمەتبارێکیان دەستگیرکرد کە بڕی 20 ملیۆن دیناری لە دوکانێکدا دزیبوو.

پۆلیسی سلێمانی لە ڕاگەیەندراوێکدا بڵاویکردەوە، دوای ئەوەی هاووڵاتییەک سکاڵای تۆمارکرد کە بڕی 20 ملیۆن دیناری لە دوکانەکەیدا لێ دزراوە، دەستبەجێ هێزەکانی پۆلیس لێکۆڵینەوەکانیان بۆ دۆزینەوە و دەستگیرکردنی تۆمەتبار دەستپێکرد، سەرەنجام و دوای وەرگرتنی بڕیاری دادوەر و گەیشتنە ئەنجامی لێکۆڵینەوەکان، توانرا تۆمەتبار لەلایەن مەفرەزەکانی نوسینگەی نەهێشتنی تاوانی ناوبازاڕەوە دەستگیربکرێت.

لە ڕاگەیەندراوەکەدا ئەوەش خراوەتەڕوو، توانرا دەستبگیرێت بەسەر بڕێک لەپارە دزراوەکەدا و تۆمەتبار (ع، ر، ح) لە دایکبووی ساڵی 1970 دانی بەتاوانەکەیدا ناوە، ئێستا بە بڕیاری دادوەرو بەپێی ماددەی 446 ڕاگیراوەو لێکۆڵینەوەکان بەردەوامە.