دەنگوباس

مەسعود بارزانی لەگەڵ میر و ئەنجوومەنی ڕۆحانیی ئێزیدیان کۆبووەوە و ڕایگەیاند، "داوکارم ئێزیدییەکان دەست بگرن بە دابونەریتی خۆیان، ڕێگە نەدرێت دەنگی نامۆ و لابەلا کاریگەری لەسەر کۆمەڵگەی ئێزیدیان بکەن".

ئەمڕۆ یەکشەممە، مەسعود بارزانی، سەرۆکی پارتی دیموکراتی کوردستان پێشوازی لە حازم تەحسین بەگ میری ئێزدی و ئەنجوومەنی رۆحانیی ئێزیدی کرد.

لە دیدارەکەدا شاندی میر و ئەنجوومەنی ڕۆحانیی ئێزیدیان داوایان لە مەسعود بارزانی کرد، کە لە پاڵپشتیکردنی داواکانیان بەردەوام بێت و ڕێگری بکات لە هەموو ئەو هەوڵانەی کە بە نیازن پەرتەوازەیی بخەنە ناو ئێزیدیەکان.

لای خۆیەوە مەسعود بارزانی جەختی لەوە کردەوە، کە ئێزیدی بەشێکی ئازیزی گەلی کوردستانن و داواشی کرد کە ئێزیدییەکان دەست بگرن بە دابونەریتی خۆیان و ڕێگە نەدرێت دەنگی نامۆ و لابەلا کاریگەری لەسەر کۆمەڵگەی ئێزیدیان بکەن، زێدی باب و باپیرانیان بەجێ بهێڵن.

مەسعود بارزانی ئاماژەی بە هەوڵی هەندێک لایەن کرد، بۆ دیاریکردنی میری ئێزیدی لە بەغدا و دەستوەردان لە کاروباری ئێزیدیان، جەختی لەوە کردەوە کە بە هەموو توانای خۆی پاڵپشتی کۆمەڵگەی ئێزیدی دەکات و ڕێگە نادات بابەتی نامۆیان بەسەردا بسەپێندرێت.