دەنگوباس

وتەبێژی وەزارەتی ئەوقاف و كاروباری ئایینیی هەرێم وادەی بەڕێكەوتنی یەكەمین كاروانی حاجییانی هەرێمی كوردستانی ڕاگەیاند، "چاوەڕواندەكرێت لە دوای 20ی ئایاری ئەمساڵەوە یەكەمین كاروانی حاجییانی هەرێمی كوردستان بۆ سعودیە بەڕێبكەون".

نەبەز ئیسماعیل، وتەبێژی وەزارەتی ئەوقاف و كاروباری ئایینیی هەرێم ڕایگەیاند، چاوەڕواندەكرێت لە دوای 20 ئایاری ئەمساڵەوە یەكەمین كاروانی حاجییانی هەرێمی كوردستان بەرەو سعودیە بەڕێبكەون، كە مامەڵەكانیان تەواوكردووە و پارەیان لێوەرگیراوە و چاوەڕوانی دەستپێكردنی گەشتەكانیان دەكەن و ژمارەیان 4685 حاجییە لە هەرێمی كوردستانەوە بەرەو سعودیە بەڕێدەكەون.

وتەبێژی وەزارەتی ئەوقافی هەرێم جەختی لەوە كردەوە، ئەمساڵ هیچ حەجێكی بازرگانی نییە و ئەوەی هەیە تەنها حەجی ئاساییە و سەر بە حكومەتی هەرێمە.

هاوکات وەزارەتی حەج و عومرەی سعودییە چەند ڕێكارێكی بۆ وەرزی حەجی ئەمساڵ ڕاگەیاند، كە حاجیانی ناوخۆ و دەرەوەی وڵاتەكە دەگرێتەوە و جەخت لە وەرگرتنی ڤاکسینی هەوکردنی پەردەی مێشک و ئیفلیجی كراوەتەوە.

وەزارەتی حەج و عومرەی سعودیە لە ڕاگەیەندراوێکدا ئاماژەی بەوەكرد، ئەو ڕێنماییانەی لەسەر حاجییانی ناوخۆی سعودییە پێویستە بۆ ئەنجامدانی ڕێوڕەسمی حەج لە ئەمساڵدا، لە ئەپڵیکەیشنی (صحتی) دیاریکراوە و بریتین لە، وەرگرتنی ڤاکسینێکی کۆرۆنای پەرەپێدراو، ڤاکسیۆنی ئەنفلۆنزا کە لە ئەمساڵدا وەرگیرابێت، ڤاکسینی هەوکردنی پەردەی مێشک، كە لە 5 ساڵی ڕابردوودا وەریگرتبێت.

ئەوەشی خستەڕوو، حاجییانی دەرەوەی سعودیە لەسەریان پێویستە ڤاکسینی هەوکردنی پەردەی مێشکیان وەرگرتبێت بە مەرجێک ماوەی 10 ڕۆژ بەسەر وەرگرتنەکەیەدا ڕۆیشتبێت و ماوەی 5 ساڵ بەسەر وەرگرتنیدا تێپەڕ نەبووبێت.

لای خۆشیەوە، وەزارەتی تەندروستی سعودیەش ڕایگەیاند، ئەو کەسانەی نیازی ئەنجامدانی حەجییان هەیە و تووشبووی ئەم نەخۆشیانەن ناتوانن ڕێوڕەسمەکە تەواوبکەن ئەوانیش بریتین لە نەخۆشییەکانی: (وەستانی گورچیلە، وەستانی دڵ، نەخۆشییەکانی سی، هەوکردنی جگەر، نەخۆشییەکانی دەمار، ئەوانەی زۆرپیرن و تووشی نەخۆشی لەبیرچوونەوە بوون).