دەنگوباس

لەسەر سکاڵای هاووڵاتییان لە هەولێر بەدواداچوون بۆ چەندین بریکاری خۆراک دەکرێت، بەهۆی پاک ڕانەگرتنی شوێنی دابەشکردنی بەشەخۆراک.

ئەمڕۆ یەكشەمە، بەڕێوەبەرایەتی رێكخستنی پسووڵەی خۆراكی هەولێر بڵاویكردەوە، لیژنەکانیان لەسەر سکاڵای هاووڵاتییان، بەدواداچوونێکی مەیدانیان کرد بۆ بریکارەکانی مەرکەز (207) و (213) ئارد و خۆراک.

ئاماژەی بەوەکرد، لیژنەكە بەدواداچوونی کردووە بۆ ئەو کەموکوڕییانەی کە هاووڵاتییان ئاراستەیان کردبوون، سەبارەت بە کەمتەرخەمی بریکارەکان لە چۆنیەتی شێوازی پاک هەڵگرتنی بەشە ئازووقەی هاووڵاتییان لە دوکانەکاندا، مامەڵەی پێویست لەگەڵ هاووڵاتییان لە کاتی سەردانیکردنیان بۆ لای بریکارەکانی خۆراک.

لیژنەکە چەند ڕێنماییەکیان بە بریکارەکان دا سەبارەت بەشێوازی خزمەتکردنی هاووڵاتییان لە کاتی وەرگرتنی بەشە ئازووقەی مانگانەیان و هەڵگرتنی مەوادەکان بەشێوازێکی تەندروست، هەروەها دانانی تابلۆی ناوی بریکار لە سەرەوە و بەردەم کۆگاکانیان.

هەر لەو بەدواداچوونەدا بریکارەکان ئاگادارکرانەوە لە هەر کەمتەرخەمییەک بەرامبەر هاووڵاتییان بنوێنن، سزادەدرێن.