دەنگوباس

وەزارەتی دارایی و ئابووری هەرێم داوای لە وەزارەت و فەرمانگەکان کردووە لیستی مووچەی مانگی ئایار بە پلەبەرزکردنەوەوە بنێرن، ئێستاش دەست بە وردبینی لیستەکان کراوە. 

ئارام عەبدوڵا، بەڕێوەبەری گشتیی بودجە لە وەزارەتی دارایی هەرێمی کوردستان ڕایگەیاند، بەپێی بڕیارەکەی دادگای فیدڕاڵی عێراق مووچەی فەرمانبەرانی هەرێم وەک عێراقی لێدەکرێت، هە ربۆیە بڕیارە حکومەتی عێراق پارەی پلەبەرزکردنەوەکە خەرجبکات. 

بەپێی یاسای بودجە هەڵسەنگاندن بۆ مووچە دەکرێت، کورتهێنانیش هەبێت، حکومەتی عێراق قەرەبووی دەکاتەوە.

هاوکات هەشت ساڵە بەهۆی قەیرانی داراییەوە پلەبەرزکردنەوە ڕاگیراوە، هەر فەرمانبەرێک یەک بۆ سێ پلە بەرزدەکرێتەوە، بەگوێرەی خزمەت و بڕوانامە بۆ هەر پلەیەک لەنێوان 28 بۆ 68 هەزار دینار دەخرێتە سەر مووچەکەی، بەپێی خەمڵاندنی وەزارەتی دارایی، پلە بەرزکردنەوە مانگانە 70 بۆ 100 ملیار دیناری پێویستە.