دەنگوباس
بزوتنەوەی گۆڕان لە ڕاگەیەندراوێکدا بڵاویکردەوە، سەردانەكەی قوباد تاڵەبانی، جێگری سەرۆكی حكومەتی هەرێم بۆ گەرمیان تەنها بانگەشی پێشوەختەی هەڵبژاردن بووە.

مەكۆكانی كفری و كەلاری بزوتنەوەی گۆڕان لە ڕاگەیندراوەکەدا ئاشكرایان كرد، سەردانەكەی جێگری سەرۆكی حكومەتی هەرێمی كوردستان، بانگەشەی پێشوەختەی هەڵبژاردن بووە، لەكاتێكدا ناوچەكە هیچ پڕۆژەیەكی ستراتیژی و پێویستی بەخۆیەوە نەدیوە.

هاوکات لێپرسراوی نوێی مەڵبەندی چەمچەماڵی یەکێتیی نیشتمانیی کوردستان دەستەبەکاردەبێت، بەپێی زانیارییەکان سەرکەوت کوبە هەفتەی داهاتوو وەکو لێپرسراوی نوێی مەڵبەندی 12 ی رێکخستنی چەمچەماڵی دەستبەکاردەبێت.

ڕاگەیەندراوێک لە مەکۆکانی بزوتنەوەی گۆڕان لە گەرمیان:
سەردانی قوباد تاڵەبانی تەنیا نمایش و بانگەشەی پێشوەختی هەڵبژاردن بوو، لە ساڵیادی سی و شەش ساڵەی مەرگەساتی ئەنفال، قوباد تاڵەبانی جێگری سەرۆکی حکومەتی هەرێم، سەردانێکی دوو ڕۆژەی بۆ گەرمیان ئەنجام دا.

لەکاتێکدا، خەڵک و کەسوکاری سەربەرزی شەهیدانی ئەنفال چاوەڕوانی هێنانەوەی رووفاتی ئازیزانیان بوون لەلایەن حکومەتی هەرێمەوە، بەڵام جگە لە دانانی تاجەگوڵینەیەک جێگری سەرۆکی حکومەت هیچی دیکەی پێ نەبوو، مایەی سەرنج بوو، لە ڕووی خزمەتگوزاری و هەلی کاریش هیچ پرۆژەیەکی ستراتیژی گەورە و پڕ بەرهەم بۆ خەڵکی قوربانیدەری گەرمیان ڕانەگەیاندرا، لەکاتێک گەرمیان و شارەکانی زۆرترین داهاتی نەوت و ناوخۆیان هەیە.

سەبارەت بە شاری کفرییش ئەو پڕۆژانەی قوباد تاڵەبانی کردنیەوە و یان بەڵینی پێدابوون بکرێنەوە، بەشێکی زۆریان بەرهەمی مانگرتوانی شاری کفری بووە و پێشتر بەڵێنی جێبەجێکردنیان دراوە، هەر بۆیە ئێمە لە بزوتنەوەی گۆڕان لە گەرمیان بڕوای نەگۆڕمان بە خزمەتکردنی خەڵکی ناوچەکەمان هەیە بێ منەت کردن و پێ فرۆشتەوە و چاوەڕوانی ئەوە بووین، کە جێگری سەرۆکی حکومەت ئەو دەیان پڕۆژەی کە لە گەرمیان هەبوون و لەکار کەوتوون بەگڕبخستبایەتەوە، نەک ئەو بەڵێنانەی چوار ساڵ پێش ئێستا بەخەڵکی بەشمەینەتی گەرمیان بفرۆشێتەوە.

سەبارەت بە حکومەتی خۆجێی گەرمیان و بەشداری گۆڕان یش، چەندین جار جەختمان لە گۆڕانکاری لە پۆست و بەرپرسیارێتیەکان کردووەتەوە و دیارە کام لایەن نەهاتووەتە پێش.

#باشووری کوردستان
#باشووری_کوردستان