دەنگوباس
دوابەدوای بڕیاری ئەنجوومەنی وەزیرانی هەرێمی کوردستان بەڕێوەبەرایەتی ئاوی سلێمانی ڕایگەیاند، لێخۆشبوون لە پارە و قەرزی ئاو بەڕێژەی 20% چووەتە بواری جێبەجێ‌ كردنەوە.

ئامانج جەلال، وتەبێژی بەڕێوەبەرایەتی ئاوی سلێمانی ڕایگەیاند، هاووڵاتییان ئاگاداردەکەینەوە، بڕیاری لێخۆشبوونی 20%ی قەرز و پارەی ئاوی هاوبەشان لە ڕێکەوتی 8- 4- 2024ەوە چوورتە بواری جێبەجێ‌ كردنەوە.

ڕاشیگەیاند، ئێستا هاووڵاتییان دەتوانن سەردانی بنكەكان و سوودمەندبن لە داشكاندنی ئەو بڕە لە پارەی ئاو یان ئەو قەرزەی لەسەریانە.

ئەمەش لە کاتێکدایە، وەزارەتی شارەوانی و گەشتوگوزار لە نووسراوێكدا، بۆ گشت فەرمانگە و بەڕێوەبەرایەتییەكانی، جێبەجێكردنی بڕیاری ئەنجوومەنی وەزیرانی هەرێمی ڕاگەیاندووە، كە بە ژمارە (4651 لە 7/4/2024) دەرچووە لێخۆشبوون بە ڕێژەی 20% لە قەرزە كەڵەكەبووەكانی سەر هاووڵاتییان و كرێكانی وەزارەتی شارەوانی و گەشتوگوزار.