دەنگوباس

پارێزگاری سلێمانی ڕایدەگەیەنێت، جەنگێکی جیهانیی بەرپابووە، ئێستا لە بەردەمی ماڵەکانماندایە، پێویستە ستراتیژێکی یەکگرتووی نیشتمانیی کوردستانیی هەبێت، خۆمان تێکەڵی ئەجێندا و پیلانی نێودەوڵەتی نەکەین.

ئەمڕۆ هەڤاڵ ئەبوبەکر، پارێزگاری سلێمانی بابەتێکی لە لاپەڕەی خۆی لە تۆڕی کۆمەڵایەتی فەیسبووک بڵاوکردەوە و تێیدا دەڵێت: "جەژنی ڕەمەزان تەواوبوو، یادی ئەنفالە، دوای ئەویش جەژنی قوربانە، جەنگێکی جیهانیی ڕانەگەیەندراو لە دنیادا؛ بەرپابووە، ئاگرەکەی لە ئۆکرانیا هەڵگیرسا، بە زۆر شوێندا تێپەڕی، گەیشتە فەڵەستین، دواتر سوریا و لوبنان، ئێستا لە بەردەمی ماڵەکانماندایە".

دەشڵێت، وزە، زەوی کشتوکاڵیی و بەرهەمە خۆراکییەکان، ئاوو ژینگە، سەرچاوەکانی کەرەستەی خاو، دەست و هێزی کرێکار، بەرهەم و بازاڕ، چەکی عەمبارکراو، چەکە ئەتۆمیی و کۆکوژەکان، ڕێڕەوی نوێی بازرگانیی؛ لە زۆربەی زۆری ئەم جیهانەدا؛ لە قەیراندان.

لە بەشێکی دیکەی نووسینەکەیدا ئاماژەی بەوەکردووە، هەموو ئەمانە بۆ جیهان؛ هەڕەشەن، لە کوردستاندا؛ دەرفەتن، تەنها ئەگەر یەکبوونێکی نیشتمانیی و سەرێکی کۆکەرەوە و بیرێکی ورد و تیژ، دوور و ژیر و ئەزمونمەند هەبێت، بەرنامە و ڕۆژەڤ وستراتیژێکی یەکگرتووی نیشتمانیی کوردستانیی هەبێت، خۆمان تێکەڵی ئەجێندا، پیلان و ململانێ و شەڕە ناوچەیی و نێودەڵەتییەکان نەکەین، ئاگرەکە نامانسوتێنێت و پارێزراودەبین و لە بەشێک لە پاشکۆی کێشەکانەوە، دەبین بەسەرچاوەی چارەسەر.

هەڤاڵ ئەبوبەکر، ڕووەو بەرپرسانی هەرێمی کوردستان و سلێمانیش بە تایبەتی دەڵێت: تکایە ئەمجارەیش؛ میرو گزیر بە نگینی موڵکی سلێمانی و کوردستانەوە مەکەن؛ قەدری بزانن، ئەم هەموو جەژن و یاد و شین و شادییانە بکەن بەدەرفەتی ئاشتیی و یەکبوونی نیشتمانیی و هەر برینێک کە لە دڵدایە؛ ساڕێژی بکەن.