فراكسیۆنی پارتی: كۆمەڵێك دەستڕۆیشتوو لە سلێمانی كێشەی غاز بۆ هەولێر و دهۆك دروست دەكەن

دەنگوباس - هەولێر
فراكسیۆنی پارتی لە پەرلەمانی كوردستان هۆكاری نەگەیشتنی غاز بە هەولێر و دهۆك بۆ "كۆمەڵێك دەستڕۆیشتووی سلێمانی" دەگێڕێتەوە.

فراكسیۆنی پارتی لە ڕاگەیەندراوێكدا كە وێنەیەكی دەست "دەنگوباس" كەوتووە، باس لە هۆكاری دروستبوونی قەیرانی غاز لە هەولێر و دهۆك دەكات و تێیدا هاتووە: "بەنیگەرانییەکی قوڵەوە کۆمەڵێک دەست ڕۆیشتوو لە سلێمانی لەپێناو بەرژەوەندی کەسی خۆیان هەستاون بە تەگەرە دروستکردن لە ناردنی غازی شل بۆ هەولێرو دهۆک بە ئامانجی دروستکردنی کێشەو گرفت بۆ هاوڵاتییان".

فراكسیۆنی پارتی دەڵێت: "دوای ڕاگەیاندنی پرۆسەی چاکسازی لەهەرێمی کوردستان و پرسی شەفافبوون لەسەرجەم سێکتەرەکاندا پرسی غاز یش کەوتۆتە ئەو چوارچێوەیە و پێشتر بەبێ ڕەچاوکردنی مەرجە یاساییەکان دراوەتە کۆمپانیایەک کە بێ تەندەرو بە هەڕەمەکی بووە، بەڵام ئێستا لە ڕێی تەندەرەوە دراوەتە کۆمپانیایەکی دیکە بەشێوەیەکی یاسایی و ئامانجی ئەمەش نەهێشتنی قۆرغکاری و واستەکاری بووە،بەڵام کۆمەڵێک مافیا ڕەفتار ئەمەیان پێ قبوڵنەکرا".

ئەوەشی خستووەتەڕوو كە "دوێنێ لەکاتی گواستنەوەی غازەکە بۆ هەولێرو دهۆک ژمارەیەک چەکداری ناسراو هەڵیانکوتاوەتە سەر تانکەرەکان و چوونەتە سەر ئەو کۆمپانیایەی کە ئەرکی گواستنەوەی غازەکەیان لە ئەستۆبووەو توندو تیژییان بەرانبەر خاوەنی کۆمپانیا ئەنجامداوەو ئێستا کەوتۆتە نەخۆشخانەو داوای بەش و پشکیان لێی کردووە".

لە كۆتایی ڕاگەیەندراوەكەی فراكسیۆنی پارتیدا هاتووە كە "ئەوپەڕی نیگەرانی خۆمان لەم ڕووداوە ڕادەگەینین و بەتوندی ئیدانەی ئەم کارە دەکەین و پاڵپشتی هەموو ڕێکارێکی یاسایی دەکەین لەم پرسەداو داواکارین بەهۆی حەزو چاوچنۆکی کەسانێک بۆ دەستخستنی پارەی نایاسایی هاوڵاتییان باجەکەی نەدەن و غازی هاوڵاتییان بەڕۆژی ڕوون دەستی بەسەردا نەگیرێت".

هەر ئەمڕۆش وتەبێژی حكومەتی هەرێم لە ڕاگەیەندراوێكدا ئەوەی خستەڕوو كە "چەند كەسێكی دەستڕۆیشتوو لە گەرمیان و سلێمانی" هۆكارن بۆ ڕێگرتن لە ڕەوانەكردنی غاز بۆ هەولێر و دهۆك و هەڕەشەی گرتنبەری رێكاری یاساییشی كرد بەرامبەر ئەوانەی كە بە "مافیا" وەسفیكردن.